Assam police-te'n Mizo police an man ; Zan khat hnuah bail-a chhuah a ni

Assam police-te chuan Zophaia Mosolman biak-ina duty lai Mizo police Laldintluanga Ralte, 1st IR Bn. chu October 29, Zirtawpni khan bomb tipuaktua puhin zing dar 3 velah an man a, Mizoram sorkar aiawhte'n hma an lak hnuah October 30, Inrinni zan khan bail-in an chhuah.

Vanglaini thu dawn danin, Assam ram chhungah bomb puak a awm a, chumi kaih­­hnawihah chuan Assam police-te chuan Laldin­tluanga chu an man a, thubuai siamsakin, Hai­lakandi Jail-ah dah a ni.

Laldintluanga Ralte hi chhuah tura Bairabi Police Station officer in-charge Lalrinhlua'n a ngen pawhin Assam lam chuan an chhuah duh lawk lo a; October 30 zan khan Bairabi OC ho vêkin Hailakandi Jail aṭangin bail-in an la chhuak a, zan dar 9:45 velah Bairabi thlenpui a ni.

Thu dawn danin, Assam police-te hian Laldin­tluanga chhuah a nih dawn chuan Zophaia Mizoram sorkarin J Lian­chungnunga ram aṭanga Chhunga leilet inkara lei dawhna hmanruate dah sawn an phût a; an phût ang hian lei dawhna hmanruate chu dah sawn niin, nimin thleng khan dah lêt a la ni lo.

Laldintluanga Ralte chhuah phût hian MZP sub-headquarters, Bairabi chuan Inrinni tlai dar 4 aṭang khan tiam chin awm loin Bairabi kawng aṭanga Mizorama hnam dang lirthei lut leh chhuak tur an dang a; Laldintluanga Bairabi thlenpui a nih hnuah lirthei an dan chu an titawp nghal.

Bairabi MZP chuan thuchhuah siamin, Zophai (Inner Line Reserve Forest sq. miles 509 ) huam chhunga Assam Police leh Forest department-te an duh duh huna kala thing leh maute an vât ṭhin chu Mizoram sorkarin bengkhawn se an duhthu an tarlang a, "Mizoram police-te patrolling a tam thei ang ber neihtir ṭhin turin kan ngen a ni," an ti.

Laldintluanga Ralte boruak avangin Mizoram Police leh Assam Police-ten joint duty an neihna hmun pakhatah Mizoram Police-te duty ngam lo ni awm ang zia zangin nizan (October 29) aṭangin an duty post an luah lum lo nia tarlangin Bairabi MZP chuan, "Hei hi hriatthiam a har kan ti hle," an ti a, police-te an duty na tura tihah huaisen taka duty chhun­zawm tir turin sorkar an ngen.