Kum nga chhungin Mizoramin Tax leh non tax revenue hmu tlem ber

Tun hnai kum nga chhung khan state sorkarin chhiah aṭanga sum a hmuh (state own tax revenue) leh chhiah ni chiah lo thil dang aṭanga state-in sum a hmuh (state own non tax revenue) ṭhin angah, Mizoram chu India ram state 29 zinga sum hmu tlem ber a ni.

Reserve Bank of India (RBI)-in Hand­book of Statistics on Indian States an buat--saiha tarlan danin, Mizoram hian kum 2012-13 aṭanga kum 2016-17 chhung khan state own tax revenue (SOTR)-ah cheng vbc. 1,360 leh state own non tax revenue (SONTR)-ah cheng vbc. 1,190 a hmu a, a pahnih belhkhawm chu cheng vbc. 2,550 a ni.

State own non tax revenue bikah chuan Mizoram hian Nagaland leh Manipur aiin a hmu tam zawk a, mahse, Manipur leh Naga­land hian state own tax revenue lamah Mizo­ram aia an sum hmuh a tam zawk avangin, a belkhawmah chuan Mizoramin a pha lo.

Mizoramin state own non tax revenue a hmuh dan chu - kum 2012-13 ah cheng vbc. 210, kum 2013-14 ah cheng vbc. 190, kum 2014-15 ah cheng vbc. 240, kum 2015-16 ah cheng vbc. 270 (revised estimate) leh kum 2016-17 ah cheng vbc. 280 (budget estimate) a ni.

State own tax revenue a hmuh dan chu, kum 2012-13 ah cheng vbc. 220, kum 2013-14 ah cheng vbc. 230, kum 2014-15 ah cheng vbc. 270, kum 2015-16 ah cheng vbc. 310 (revised estimate) leh kum 2016-17 ah cheng vbc. 330 (budget estimate) a ni thung.