Cyber crime inhrilhhriatna hun buatsaih

CID (Crime) leh Police Headquarters Training Branch ṭangkawp chuan nimin khan ATI conference hall-ah Cyber Crime Awareness Programme an buatsaih a, Home minister R Lalzirliana'n a hawng.

Home Minister chuan, khawvel ṭhang zelah mihring nunphung tizângkhai thei turin thil hrang hrang hmuhchhuah a ni zel tih sawiin, "Chung zinga kan chhawr ṭangkai em em pakhat chu internet hi a ni a, kalna apiangah internet connection a awm a, kan mobile phone thlengin internet kan hmang thei ta a ni. Ṭangkai hle mahse fimkhur a ngai a, hmansual emaw hman fimkur loh chuan min vaw let thei tam tak a keng tel a ni," a ti.

Home secretary Lalnunmawia Chuaungo pawhin thu sawiin, cyber crime chu information technology (IT) ken tel a nih thu a sawi a, "IT a inthlak a, a danglam ang zelin cyber crime pawh a inthlak a ni. Cyber Crime Awareness hi a pawimawh rualin, a hnuah kan inzir zui peih a ngai. Cyber crime tam tak a awm a, heng hi mipuiin kan hriat zau zawk theih nan inhrilhhriatna neih a pawimawh hle. Thil sual a ni tih hre loa lo tihsual a awm thei a ni," a ti.

Cyber Crime Awareness-ah hian deputy SP rank pali aṭanga additional SP rank 19 an tel a, cyber crime leh a kaihhnawih te, ATM card leh bank account chungchanga buaina thleng thei te, IPC-a cyber crime lam dante leh case study-te zirtir an ni.