YMA Day hlim taka hmang turin Central YMA-in duhsakna a hlan
Central YMA chuan YMA Day thuchhuah a tichhuak a; Mizo mipui zawng zawng YMA Day chibai bûkin, hlim leh uar taka hmang turin duhsakna an hlan. YMA Day thupui atan 'Ram leh hnam humhalh' hmanga programme duang ṭheuh turin branch tin an ngen a, "Kan khawtlang ṭheuha a chhe lai leh siamṭhat ngaite siamṭha turin hmalak ni se," an ti.
YMA Day, June 15 chu Mizoram sorkarin pisa chawlhah a puan avangin an lawm tak zet tih tarlangin CYMA chuan, "Sorkarin pisa chawlha a puan remchanga hmanga pawl leh kohhrante'n programme dang siam lo a, he ní hi mi dangte tana inpekna nía hmang ṭheuh tur leh, khua leh veng chhung tana ṭangkai taka hun hmang ṭheuh turin mi tin kan ngen," an ti. A hnuaia mi hi CYMA-in YMA branch tin hnena a thuchah a ni.
1) YMA Day 2018 thupui atan ‘Ram leh hnam humhalh’ hmanga programme duang ṭheuh turin kan inbeisei a, kan khawtlang ṭheuha a chhe lai leh siamṭhat ngaite siamṭha turin hmalak ni se.
2) YMA hi ṭanpui ngaite ṭanpui tura pawl din a nih angin, veng chhunga mi harsa leh chhumchhiate dap chhuak a, a theih ang anga ṭanpuina hlan ni se. YMA branch tinah chenna in thawm ṭhat ngai leh chhuanchham mai turte dap chhuak a, a theih leh remchan anga chhawmdawl turin kan ngen a, mite harsatna sutkiansakna ní leh mangangte ṭanpuina ní atan hman ni se.
3) Damlo mangang ṭanpui ngaite thisen pek kawngah YMA branch tinte leh member tinte ṭhahnemngai turin kan inngen a, faina leh thianghlimna hi YMA-te'n kalphung ngheta kan lo neih tlat tawh angin, he ni denchhen hian veng chhung thenfai hnatlang neih ni se.
4) YMA branch-te'n a remchan dan azirin hospital/home/centre-ahte ṭanpuina thilpek hlan ni se. YMA in, library, lungphun, signboard leh thil dangte tuaithar leh ni se, YMA hall-te YMA rawng (flag rawng) a chei uar tum ni se.
5) Ṭhangtharteah tlawmngaihna leh aia upa zah inzirtir thar leh nan hman tum ni se. Mizo thuam inbel uar tura ṭan lak nan hman ni se.
6) YMA Day-ah hian branch huam chhungah hmun langsâr lai takah branch YMA flag a ngul sang taka tàr vek ni se.
7) YMA kum 83-na hi hlim tak leh uar taka hmang turin Mizo mipui duhsakna kan hlan e.