BJP-in August-ah beihpui thlâk ṭan an tum ; Sum kan hmatheh dawn lo - BJP GS

BJP national general secretary Ram Madhav chuan, kumin Mizo­ram Assembly inthlanpui awm tur atan August thla aṭangin beihpui an thlak dawn thu a sawi a, "Sum kan hmatheh dawn lo," a ti.

Ram Madhav hian nimin khan Hotel Regency-ah thuthar thehdarhtute a kâwm a; BJP-te'n mihring ṭha, Mizoram chhan thei tur an zawn mek thu sawiin, "June leh July vel chu Mizoramah ruahtui a tlak nasat ṭhin avangin August aṭangin kumin MLA inthlan lo awm tur atan beihpui kan thlak ṭan ang," a ti a, booth level aṭanga hma an lak ṭan tur thu a sawi.

Hmarchhak state dangah BJP-in a mala sorkarna an siam loh pawhin, thawkhoin sorkarna an siam vek tawh nia sawiin Ram Madhav chuan, "Mizoram hi kan agenda kan la zawh loh awm­chhun a ni. Kumin inthlan a zo ang a, kan agenda kan zo ang," a ti.

BJP GS chuan, Mizoramah sor­karna an siam theih ngei a beisei thu sawiin, "Mipuiin an awih lo mai thei, mahse, hmarchhak state dang MLA kan la neih ngai lohnaah pawh sorkar kan siam thei a, entirna sawi tur a awm tawh. Hei hi kan thawhrimna leh Narendra Modi sorkar hnathawh ṭhat vang a ni," a ti a; sorkarna siam ngei turin theihtawp an chhuah tur thu a sawi.

Vanglaini palai zawhna chhangin Ram Madhav chuan, Mizoramah sum leh pai hmanga sorkarna siam an tum loh thu a sawi a, "Sum sên lamah chuan in Chief Minister a hausa a, sên tur a ngah ang, ani angin kan hausa ve lo. Khawi hmunah mah sum leh pai hmachhuana thil tih kan duh lo. Kan innghahna tur chu Narendra Modi hnathawh ṭhat a ni," a ti.

Ram Madhav chuan, Mizoram sorkar chu hmasawnna hna thawk loah puhin, "Mizoram hi ram rál­muang tak, sik leh sa boruak ṭha tak in nei chungin hmasawnna lamah in hnufûm hle. Hei hi a chhan chu sorkar ṭhat loh vang a ni a, a bik takin term hnih sorkar zawn mek Congress hi ka dem," a ti a; sorkar ṭha an duh chuan BJP sorkartir turin Mizo mipuite a sáwm.

Mizoramin peak hour laia kawlphetha a mamawh megawatt 110 vel a nih thu sawiin Madhav chuan, "Kawlphetha in mamawh ang in nei thei lo. In neih theih loh chhan hi a siamna tur hmun a awm loh vang a ni a, eirukna a tam vang a ni. Agriculture lama eizawng tamna state ni siin, agriculture product state dang aṭangin in la lut a, hei hi sorkarin a tih tur a tih loh vang a ni," a ti.

Ram Madhav chuan, Mizo ṭhalaite'n hna thawh tur an mamawh tih sawiin, "Ṭhalaite'n hna thawh tur an neih loh avangin ruihhlo lamah an tlan a, ṭhalai tam takin nunna an chàn phah a ni," a ti a; NGO-te'n ngawrh taka ruihhlo an do laia zu zawrh ringawt buaipuiah Mizoram sorkar a puh.

BJP General Secretary chuan, Mizorama hmasawnna thleng awm vete chu sorkar laipui hmalakna vang nia sawiin, "Mizoram budget tam zawk hi sorkar laipuiin a pek a ni. Sorkar laipui chuan mipuite'n state sorkar ṭhat loh avanga an tawrh lutuk a hlau. Mizo mipuite'n sorkar ṭha in phû a ni," a ti.

Tualṭo party-te nen an thawh­ho dawn leh dawn loh zawh­na chhangin BJP GS chuan, "Hmarchhakah BJP leh tualṭo party-te inzawmkhawm North East Democratic Alliance (NEDA) kan nei a, development alliance-te pawh kan ti ṭhin. Mizoram aṭang chuan NEDA-ah hian MNF an tel," a ti a; kumin MLA inthlana MNF an thawhpui leh thawhpui loh tur chu hunin a hril tur thu a sawi.

Ram Madhav chuan, BJP-in Hindu ni lo sakhaw dang zawm­tute an nékchêp ṭhin nia sawi chungchangah, "Kristian tamna Nagaland, Budhhist tamna Arunachal Pradesh leh Muslim tamna Jammu & Kahmir-ahte pawh sorkarna kan siam thei. BJP hi India mi zawng zawngte party, sakhua leh culture hrang hrangte humhimtu leh zahtu kan ni. Politics-a inchirhthehna hi awih suh u," a ti.