KHAWTHLIR

ZPM din belh
Ṭangrual pawl, ZPM chuan nimin khan Aizawl East-I huam chhunga Falkland Veng YMA Hall-ah ZPM Local Steering Committee thar dinna leh vantlang inkhawm an buatsaih a, an hun hmanpuitu ZPM general secretary K Sapdanga chuan kumin inthlanah kum 30 chuang sorkar kalphung ngaia kal nge kan duh kalphung thar hmanga kal tur kan buk tur thu a sawi. Aizawl East-I huam chhungah hian ZPM-in block committee pathum leh local steering committee 16 a ding tawh.

Career guidance
RMSA, Aizawl District chuan Aizawla high school zirlaite tan nimin aṭang khan career guidance programme Lal Thanhawla Auditorium-ah an buatsaih a, Aizawl DC Dr. A Muthamma-in kaihruaiin, Education director K Lalthawmmawia'n a hawng. He programme hian June 13 thleng a awh dawn a, sawmbikten zirlaite fuihna thu an sawi ṭhin ang.

SA-in ràlna hlân
Salvation Army, Territorial Headquarters chuan Relief & Emergency Fund aṭangin June 4, 2018-a Aizawl-Siaha bus chesuala thi mi 11-te chu. Rs. 2,000 ṭheuhin an rál a, June 4 khan Pangzawl bial commanding officer-in an hlan nghal. Lunglawna leiminin in a hnawl neitu H Vanlalpeka hnenah Rs. 20,000 leh in luahtu dang Thatlina te chhungkua, Bungtlang South hnenah Rs. 10,000 leh Arsiropuia, Chawnhû fate pahnih thite ràlna Rs. 5,000 nimin khan an hlan bawk.

Minister-in tlangzarh
VL Nghaka lehkhabu ziah, 'Mizoram Education Chanchin' tih chu nimin khan minister Lalsawta'n Ramhlun Indoor Stadium-ah a tlangzarh. Lalsawta chuan, Mizo zingah zir tam si, thiam tlem an tam nia sawiin, pawi a tih thu a sawi a, "Thiam lote thiam ve theihna turin zirlaibu siam a ṭul," a ti.

Apps hawng
Aizawl DC Dr A Muthamma chuan nimin khan DC conference hall-ah MGNREGA leh an thawhpui line department hrang hrangte hman theih tur ‘Mobile Apps for Concergence of MGNREGA and other Schemes’ a hawng. Convergence Mobile Apps hian MGNREGA leh department hrang hrangte hnathawh a chhinchhiah dawn a ni.