SIPMIU-in vantlang inthiarna an sawifiah ; Assembly Committee-in senso a tam an ti

SIPMIU, Aizawl chuan thuchhuah siamin, Aizawl khawpui chhung hmun 10-a vantlang inthiarna (community toilet) SIPMIU-in a siam chungchang an sawifiah a; tuna an siam dan aia ṭha zawka kalpui dan a awm chuang lo niin an tarlang.

Hetih lai hian, Legislative Assembly-a MLA-te awmna, Committee on Estimates chuan SIPMIU-in vantlang inthiarna a siamte chu a to uchuak hleah an ngai a ni.

SIPMIU sawifiahna
SIPMIU tarlan danin, community toilet block hi hmun 10 - Bawngkawn Bazar, AMC-Ṭhuampui, Bethlehem Vengthlang, Mission Veng South, City Bus Terminal - Ngaizel, New Market, Millennium Centre bul, Zarkawt, College Veng leh Zemabawk Bazarahte siam a ni.

Community toilet 10 siam nan SIPMIU-in a tirah estimate Rs. 1,55,55,000 (nuai 155) an siam a, mahse, Ministry of Urban Development (MoUD)-a CPHEEO-in cheng nuai 55 chiah a phalsak. Nuai 55-in community toilet block 10 sakna a daih loh avangin CPHEEO-ah thlen lehin, nuai 157 man turin estimate an remti.

SIPMIU tarlan danin, community toilet block-te chu square metre 13-44 inkara zaua sak a ni a, block tinah hmeichhia leh mipa inthiarna a hranin an siam. Toilet tinah hmeichhia leh mipa zun-in pakhat aṭanga pali leh, ek-in pakhat aṭanga pahnih zel siam a ni. Kut silna (wash basin) pakhat/pahnih ṭheuh siam a nih bakah, hmun ṭhenkhatah chuan inbualna siam tel a ni. A sakna hmun chu local council-te nen en hoa thlan a ni a, hmun remchan dan azirin chhawng khat, hnih, thum thlenga sak a ni.

Community toilet block satu tur thlang turin ADB Procurment Guidelines angin tender, National Competitive Bidding (NCB) anga chhuah a ni a, firm pakhat - SS Construction, Chaltlang, Aizawl-in an chhang a, mahse, technical qualification an tlin loh vangin hnâwl a ni. ADB phalnain tender chhuah nawn leh a ni a, firm pahnih - SS Construction, Chaltlang leh Gangwal Engineering & Construction Pvt.Ltd., Silchar ten an chháng a; Gangwal Engineering & Construction an thlang.

Gangwal Engineering & Construction-in tender a chhanna zat chu community toilet block 10 atan Rs. 2,06,32,141 (nuai 206) a ni a, tender amount Rs. 1,57,00,000 (nuai 157) aia a san avangin inremsiamin, ADB remtihnain Rs. 1,76,93,303 man contract agreement ziah a ni. Toilet block pakhat chu nuai 17.69 man tur tihna a ni. Toilet sakna hmunah electric pole, tui pekna t-cluster, tui pipeline leh tuizem hlui ṭhiah leh siamṭhat hna a tel avangin, contractor-in toilet block 10 a sak zawhna chu Rs. 1,78,80,698 (nuai 1788) niin an tarlang.

UDPA department-ina vantlang inthiarna mipa leh hmeichhia tana a hrang, wash basin leh vending unit (dawrtê) awmna sak turah design an siam ṭhin nia sawiin SIMPIU chuan, "Hetiang hi a tlangpuiin Rs. 7,00,000 vela sak zawh theih a ni a, a hmun azirin a danglam hret thei," an ti. SIPMIU-in community toilet a siamte erawh chu UDPA siam aiin a changtlung zawk a, a zau zawk nia sawiin, "Community toilet block pakhat Rs. 5,50,000-a sa tur anga tehkhin hi teh dan dik tâwk lo niin a lang," an ti.

SIPMIU chuan, community toilet block siamte chu a to hle anga a lang a nih pawhin, ADB Procurement Guidelines anga kalpui niin an sawi a, "Contractor chhanna tur dânin a phal angin negotiation neiin, theihtawpa tihhniam a ni a, hemi baka ṭha zawka kalpui dan a awm chuang lo," an ti bawk.

Assembly Committee-in to an ti
SIPMIU-in community toilet block an siamte hi September 2017 khan Assembly Committee on Estimates member MLA-te chuan an enfiah a; senso chu a to uchuak hlea an ngaih thu an tarlang. Zemawbawk North-a community toilet block chu, "Hmun tam takah a pût (leak) a, drain pawh a awm lo," tiin report-ah an ziak. An report hi Assembly session-ah an pharh tawh.

Assembly Committee on Estimates-te hian Zemabawk North-a community toilet block an enfiah hun lai hian Ṭhuampuia AMC office building hnuaia mi te, Bawngkawn Bazar leh Millennium Centre bula mite pawh an enfiah a ni. A siamna atana sum sen zat ngaihtuahin, toilet block-te chu a tê hlea an ngaih thu an ziak a, 'Thil tê tak tê tê sak nana hleihluak taka sum sênna' tiin report-ah an ziak a ni.

The Frontier Despatch April 16, 2018-a chhuakin a tarlan dan chuan, Zemabawk North-a toilet block hi chhawng hnih ni mah se, chahbi kawltu leh hman man khawntuin a tîr aṭangin a chhâwng hnuai zawk chu tui luanna a ṭhat loh avangin hman a la ni lo tih a sawi.

Assembly Committee on Estimates report-in a tarlan dan chuan, vantlang inthiar­na 10 sakna atana a tira approved original estimate chu cheng nuai 55 (chawhrualin pakhat atan nuai 5.5) a nih laiin, sak zawh a nih chuan cheng nuai 178.80 (chawhrualin pakhat atan nuai 17.88) sên a ni.

Estimates Committee hian SIPMIU official-te thil awmzia an zawhfiah a, SIPMIU pawhin an sawifiah a ni. Mahse, SIPMIU sawifiahna chu Estimates Committee chuan an pawm mai duh lo a, tender document-te an hnena thehlut turin an hriattir nghal.

Millennium Centre bula community toilet block sak chungchangah, agreement amount let chuang daiha sak a nih avangin Estimates Committee-in SIPMIU official-te an zawtfiah bawk. SIPMIU official-te chuan, community toilet block chu Sikulpuikawna sak tura ruahman a ni a, chhan eng emaw avangin Millennium Centre-ah an sawn leh si a; Millennium Centre-a sawn a nih hian DPR thar siam a ni lo a, Sikulpuikawn atana DPR siam tawh chu an kailek vel ta mai niin an chhang a ni.

Assembly Committee on Estimates ding lai hi August 31, 2016-a din a ni a, chairman chu PC Zoram Sangliana niin, member dangte chu - JH Roṭhuama, K Sangṭhuama, Lalrobiaka, John Siamkunga, Chalrosanga Ralte leh Lalrinawma te an ni.