KS Thanga'n zirlaite lawmpuina a hlan

Aizawl South-III bialtu MLA KS Thanga chuan nimin khan a pisaah a bial chhunga HSLC leh HSSLC pass tharte lawmpuina hun a buatsaih a, HSLC leh HSSLC pass thar mi 569 hnenah lawmpuina thilpek a hlan.

KS Thanga chuan, sorkar anga an manganna chu central service-a Mizo tling thei lo lutuk a nih thu sawiin, "Mizoram sorkara hna pawimawh chelh thei turin kan zirlaite hi kan buatsaih a ngai tawh tak zet. Central service-ah hian kan ṭhalai lehkhathiam tam zawkte hi an luh tam theih nan Mizoram sorkar chuan ruahmanna a siam chho zel a ni. Sorkar ang mai ni loin, ram mipui, NGO lian YMA leh MHIP-te pawhin nau vei taka kan vei a ṭul tawh," a ti.

KS Thanga hian HSLC leh HSSLC distinction leh first division-a pass-te chu Oxford Dictionary a hlan a, second leh third division a pass-te chu Concise Learner Dictionary of Mizo a hlan thung. HSLC top 10-a lang pahnihte Rs. 10,000 ve ve a hlan bawk.

Inkhawmah hian KS Thanga chuan a bial chhunga YMA group leh branch te, MHIP block-te hnenah oxygen concentrator, mini PA set, laptop leh printer a hlan nghal a ni.