IAF-in Lungleia kângmei an ṭhelh man Rs 14,11,221 sorkarin a pek a ngai

Kumin April thlaa Lunglei district-a kângmei chhuak Indian Air Force (IAF)-in helicopter hmanga an ṭhelhna man leh helicopter khalhtu (pilot) leh thawktu dangte tana senso zawng zawng chu Rs. 14,11,221 a ni a, hengte hi Mizo­ram sorkarin a pêk a ngai dawn.

GAD Civil Aviation Wing hotute hnen aṭanga thu dawn danin, IAF helicopter-in Lungleia kângmei a ṭhelhna bika senso (bill) chu Deputy Director Account, Air Headquarters (RKP), RK Puram, Delhi aṭangin Aviation Wing chuan October 25, 2021 khan an dawng a; bill-a a inziah dan chuan, April 26, 2021-ah kâng ṭhelh turin IAF helicopter a che chhuak a, kang ṭhelhna bika senso zat chu Rs 12,05,586.34 a ni.

Civil Aviation Wing hotute sawi danin, IAF helicopter hman man pek ngai an dawn chu Disaster Management & Rehabilitation (DMR) department-ah an thlen leh nghal dawn a; helicopter khalhtu pahnih leh an ṭhuihruaite tana senso pawh a hmain DMR department-ah an lo thlen tawh.

Vanglaini chuan DMR department-ah RTI Act hmangin July 4, 2021 khan kâng ṭhelhna atana IAF helicopter hman man chungchang a lo dil tawh a; DMR department chuan August 17, 2021 khan chhànna a pe chhuak. Zawhna luh hun leh chhanna an pek lai hian IAF aṭangin helicopter hman man an la dawng lo a, chuvang chuan, a thlàwna hman tur nge, hman man a awm dawn tih an la hre lo tih an tarlang.

Indian Air Force helicopter crew pahnih leh an ṭhuihruaite lo buaipuina atan Mizoram sorkar chuan Rs 2,05,683 a séng a; heta senso hi DMR department-in State Disaster Respond Fund (SDRF) aṭangin a pe a ni. Helicopter khalhtu leh thawktu dangte ei leh in leh thlenna atana senso bik chu Rs 2,05,683 a ni a, chu'ng zinga a tam zawk chu Mizoram sorkarin a rûl tawh a, Aijal Club-a an thlenna senso bik Rs 74,473 chu tun thlengin pek a la ni lo.

IAF crew pahnih leh an ṭhuihruai mi pakua, an vaiin mi 11-te chu Aijal Club-ah April 30, 2021-ah an thleng a, deluxe room, junior suite leh double room pahnih ṭheuh leh single room panga an luah a ni. Hetih lai hian, Civil Aviation Wing hotute chuan, "Hetianga chhiat tawhna a awm leh a nih chuan, DMR department hian a hma aṭangin contingency plan fel tak nei sa se, a kaihhnawih department-te member-ah ruat se, thil tih a awlsam ang," an ti.