CIC thar la lut

Mizoram chief infor­mation commissioner (CIC) atan Lalnun­mawia Chuaungo, IAS (Rtd.) chu nimin khan chief minister Zoram­thanga’n Mizoram Assembly House conference hall-ah rinawmna thu tiamtirin a la lut.

Lalnunmawia Chuaungo hian Mizoram State Infor­mation Commission-a CIC kal chhuak Lalduhthlana Ralte, IFS (Rtd) chu a thlâk a, CIC palina a ni. CIC-ah hian IAS leh IFS pahnih ve ve an awm tawh a ni.

Lalnunmawia Chuaungo hi March 1, 1962-ah a piang a, kum 1987-ah IAS zawmin, Gujarat Cadre a ni. Kum 2019 khan inter-cadre deputation-in Mizoram Chief Secretary-ah dah a ni a, October 29, 2021 khan voluntary retirement-in a hna a chawlhsan. A nupui leh fa palite nen Chaltlangah an khawsa mek a ni.