Draft roll-ah voter 7,98,227 an awm

Mizorama electoral roll ennawnna, Photo Electoral Rolls Special Summary Revision, 2022 neih tura Draft Electoral Roll 2022-ah Mizoramah voter 7,98,227 an awm a, mipa 3,88,195 leh hmeichhia 4,10,032 an ni. Tuirial Assembly constituency erawh chu by-election neih a nih avangin telh a ni rih lo.

Election Commission of India thuchhuak anga Mizorama Photo Electoral Rolls Special Summary Revision, 2022 neih turah hian chief election officer (CEO) P Jawahar chuan nimin khan Draft Electoral Roll 2022 a tichhuak a ni.

Draft Electoral Roll 2022-ah hian mipa aiin hmeichhia 21,837 in an tam zawk a; service voter 4,986 awmin, mipa 4,916 leh hmeichhia 70 an ni a, Mizoram pumah polling station 1,247 a awm.

CEO P Jawahar chuan, India khua leh tui dik tak, January 1, 2022-a kum 18 tling turte tan November 2021 chhungin anmahni bialtu ERO/AERO/BLO hnenah electoral roll-a inthun dilna an thehlut thei tih a tarlang. nvsp.in/, voterportal.eci.gov.in/ leh Voter Helpline app aṭangtein dilna thehluh theih a ni bawk.

Draft Roll 2022-a a lan danin, Aizawl district-ah vote nei tam berin, mi 2,71,374 an awm a; Hnahthial district-ah voter tlem berin, 15,465 an awm a ni.

AIZAWL DISTRICT
Draft Roll ang chuan Aizawl district-ah voter 2,71,374 awmin, mipa 1,27,485 leh hmeichhia 1,43,889 an ni a, mipa aiin hmeichhia 16,404-in an tam zawk. Service voter 1,762 an awm bawk. Draft Roll 2022-a voter 2,71,374 chu Electoral Roll 2021-a voter 2,71,428 aiin mi 54-in an tlem zawk.

Aizawl district-ah Assembly constituency 12 a awm a, polling station 305 awmin, polling station pakhatah voter 889 an awm zel anga chhût a ni.

LUNGLEI DISTRICT
Lunglei district-ah hian Assembly bial paruk a awm a; voter 95,213 awmin, mipa 47,327 leh hmeichhia 47,886 an ni. Draft Roll 2022-ah Lunglei North, Lunglei East, Lunglei West leh Lunglei South bialahte mipa aiin hmeichhia an tam zawk.

SIAHA DISTRICT
Siaha district-ah hian Assembly pahnih a awm a, voter 41,943 awmin, mipa 20,361 leh hmeichhia 21,431 an ni a; service voter mi 151 an awm.

CHAMPHAI DISTRICT
Champhai district-ah chuan Assembly bial pathumah voter 54,117 an awm a, mipa 26,521, hmeichhia 27,656 leh service voter 449 (mipa vek) an ni.

Electoral Rolls 2021 (voter 54,227) nena khaikhinin Draft Rolls 2022 (voter 54,117)-ah hian vote nei zat chu mi 50 (-0.9%)-in a kiam. Continuous updation kaltlanga dilna lut 55 pawm a ni a, awm nawn pakua leh insawn 83 paih niin, paih zat chu a vaiin 92 a ni.

KOLASIB DISTRICT
Kolasib district-ah Assembly bial pathum a awm a, Draft Electoral Roll 2022-ah hian tun hnaia by-election neihna Tuirial AC tarlan tel a la ni lo a, November 8, 2021-ah tihchhuah a ni ang. Kolasib leh Serlui bialah polling station 63 an awm a, voter 43,336 awmin, mipa 20,935 leh hmeichhia 22,401 an ni.

SERCHHIP DISTRICT
Serchhip district-ah Assembly constituency pathum awmin, polling station 85 a awm a; voter nei 52,349 awmin, mipa 25,683 leh hmeichhia 26,666 an ni a, voter zinga mi 416 (mipa 413 leh hmeichhia pathum) chu service voter an ni.

LAWNGTLAI DISTRICT
Lawngtlai district-ah Assembly bial pathumah voter 85,087 awmin, mipa 42,370 leh hmeichhia 42,717 an ni a, chu'ng zinga 226 chu service voter an ni. Electoral Roll 2021 nena khaikhinin, Draft Roll 2022-ah voter 64-in an tlem zawk a, a tlemna chu 0.08% a ni.

MAMIT DISTRICT
Mamit district-a Assembly bial pathumah vote nei mipa 35,151 leh hmeichhia 34,190 awmin, an vaiin mi 69,341 an ni a; vote nei thar mi 66 leh roll aṭanga paih mi 82 an awm. Voter zinga 317 chu service voter an ni.

KHAWZAWL DISTRICT
Khawzawl district-ah Assembly bial pakhat a awm a, polling station 28 a awm. Voter mipa 8,501 leh hmeichhia 8,467 an awm a, an vaiin mi 16,968 an ni a, service voter 96 an awm bawk.

HNAHTHIAL DISTRICT
Hnahthial district-ah Assembly bial pakhat a awm a, polling station 27-ah vote nei mi 15,551 an awm. Voter-te chu mipa 7,629 leh hmeichhia 7,836 an ni a, mipa aiin hmeichhia 205-in an tam zawk.