KHAWTHLIR

Vote chhiar dawn
October 30, 2021-a Tuirial Assembly constituency by-election-a vote tlate chu vawiin zing dar 8 aṭangin Kolasib College-ah chhiar a ni dawn. He inthlanah hian vote 14,561 (81.29%) a tla a, vote thlaktute chu mipa 7,152 leh hmeichhia 7,409 an ni. By-election-ah hian candidate pali - K Laldinthara (BJP), Chalrosanga Ralte (INC), K Laldawngliana (MNF) leh Laltlanmawia (ZPM)-te an awm a ni.

Thisen pe
Govt Aizawl College NSS chuan nimin khan an college-ah thisen pek an huaihawt a, Aizawl Civil Hospital tan thisen unit 108 an pe a, petute mipa 93 leh hmeichhia 15 an ni. GAC hian academic year 2021-22 chhunga thisen pek dan tur mumal takin an ruahman a, calendar angin thisen pek zel an tum a ni.

Sa zawrh endik
Fisheries department-a Aizawl district Fisheries Enforcement Team chuan district fisheries development officer Zonuntluangi hoin nimin khan Sialsuk tlangdung leh a chhehvela lui sa zawrhte an enfiah a; lui sa zuar ṭhinte chu The Mizoram Fisheries (Amendment) Act 2016 an hrilhfiah nghal a ni.

Kawngzawh phal lo
Election Commission of India-in inkaihhruaina a tihchhuah angin chief election officer (CEO) P Jawahar chuan nimin khan by-election-a chakte'n chak lawm nan kawng zawh phal a nih loh thu a tarlang a; candidate thlan tlinin returning officer hnen aṭanga certificate la tura amah emaw, a aiawh emaw an kalin mi pahnih aia tamin zui phal a ni lo tih a tarlang bawk.

Kawng khâr dawn
PWD chuan vawiin aṭangain Chaltlang DIET péng leh Ramhlun North (LAD Office) inkar kawng thawm ṭhat hna an thawk dawn a, hei vang hian Traffic SP Rodingliana Chawngthu chuan, hna thawh hun chhungin kawngah lirthei tlan phal a ni lo tih a puang. Kawngpui sirah lirthei leh bungrua dah phal a ni lo bawk.