COVID-19: Mizoram dinhmun ; Hripui vei 165 hmuh belh a ni
October 31, Pathianni khan Mizoramah Covid-19 vei mi 165 hmuh chhuah a ni. Nimin khan hripui vei dam tawh mi 501 chhuahtir an ni a, Covid-19 vangin mi pahnih an thi.
Covid-19 vei hmuh tharte chu mipa 75 leh hmeichhia 90 an ni a; RAT hmanga hmuh chhuah mi 146 leh Fluorescent Immunoassay (FIA) hmanga hmuh chhuah mi 19 an ni. ZMC laboratory-ah leh TrueNAT hmangin swab sample endik a ni lo.
IDSP record angin, Mizoramah Covid-19 vei 1,21,524 hmuh chhuah a ni tawh a, mipa 59,089 leh hmeichhia 62,435 an ni. Nimin tlai dar 5 thleng khan mi 1,15,113 (94.72%) chhuahtir an ni tawh a, mi 434 (0.36%) thi tawhin, enkawl mek mi 5,977 (4.92%) an awm.
October 31, Pathiannia hripui vei hmuh chhuah thar mi 165-te chu symptom nei 124 leh nei lo 41 an ni a; tualchhunga kái vek niin, hri an kàina chin hriat loh mi 112 an awm.
Siaha, Champhai, Lawngtlai leh Khawzawl district-ah hian swab sample endik a awm lo a; Siaha district-ah hian a zawnin ni hnih chhung sample endik a ni tawh lo. Kumin October thla chhungin Mizoramah Covid-19 positive mi 26,694 hmuh chhuah a ni a, chawhrualin ni tin mi 861.10 hmuh chhuah an awm ziah ang a ni a, a tlahniam hret hret zel.
Kum 2011 chhiarpui aṭanga chhûtin, Mizorama Covid-19 vei hmuh tawh 1,21,524 chu mi 1,000 zelah hripui vei mi 110 an awm ang a ni a; mi 1,00,000 zela Covid-19 vangin mi 39 an thi tawh ang a ni. Nimin khan tlai dar 5 thlengin hripui vei dam tawh mi 501 chhuahtir an ni a; Aizawl district-ah mi 279, Champhai district-ah 73, Lunglei district-ah 49, Siaha district-ah 35, Lawngtlai district-ah 30, Kolasib district-ah 21 leh Hnahthial district-ah mi 14 an chhuak.
Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,21,524 zinga mi 1,16,969 chu Mizoram chhunga kái chhâwng an ni a, mi 4,555 chu Mizoram páwn aṭanga an rawn luh hnua hmuh chhuah an ni.
