COVID-19: October 2021 dinhmun
Thla liam ta, October 2021 chhung khan Mizoramah Covid-19 vei mi 26,694 hmuh chhuah a ni a, hripui vei zinga dam tawh mi 36,508 chhuahtir niin, mi 122 an thi.
October 2021 chhunga hripui vei hmuh chhuah zat 26,694 hi Sept. thla chhunga hmuh zat aiin 8,136-in a tlem zawk a, chawhrualin ni tin mi 861 chuang hret (861.10) hmuh chhuah an awm ang a ni a; hmuh chhuah tam ber ni, Oct 4-ah mi 1,681 hmuh a ni.
Thla liam ta chhung vêk khan hripui vei dam tawh mi 36,508 chhuahtir niin, hmuh chhuah zat aiin chhuak zat 9,814-in an tam zawk a; chhuahtir an tam ber ni October 1-ah mi 1,677 an chhuak. October thla chhung khan mi 122 an thi a, thi an tam ber thla leh thla khata mi 100 chuang thi an awm vawi khatna a ni a; mitthi an tam ber ní, October ni 4 leh ni 11-ah mi pakua ve ve an thih laiin, October 29-ah thi an awm lo thung. A hmaa thi an tam ber thla, September 2021-ah mi 93 an thi a ni.
Mizorama district 11 zingah Aizawl district-ah Covid-19 positive hmuh chhuah, dam tawh chhuahtir leh hripui vanga thi an tam fál. Aizawl district-a positive hmuh zat 14,908 chu hmuh zawng zawng 26,694 aṭangin 55.85% a ni a; chhuahtir zat 22,556 chu chhuak zawng zawng aṭangin 61.78% a ni.
Hripui vanga thi zatah pawh, Aizawl district-a thi zat 68 chu thi zawng zawng 122 aṭangin 55.74% a ni a; hetih lai hian, Saitual leh Khawzawl district-ah October thla chhungin thi an awm lo.
