MLA-in Union Agriculture Minister kâwm

Horticulture Development Board vice chairman Prof. F Lalnunmawia, MLA chuan nimin khan New Delhi-ah Union Agriculture minister Narendra Singh Tomar a kâwm a, horticulture tihhmasawnna tura Mizoram mamawhte a thlen.

Sorkar thuchhuah tarlan danin, Prof. F Lalnunmawia chuan Union Agriculture Minister chu Mizoram sorkarin horticulture lama hma a lakna leh hmachhawpte a hrilh a; Mizoramah dragonfruit, tomato leh zîkhlum thar a pun mek thu a sawi.

F Lalnunmawia chuan, thei leh thlai thar kawnga hmalak belh zelna turin kumin sorkar kum kal mek (2021-22) atana MIDH fund pek tur te, dragon fruit chìnna tur sum pek belh tur te, Horticulture Centre of Excellence tihchangtlunna tur sum pe tur te, Mizorama thei leh thlai tharte dahṭhatna leh a sâwngbâwlna changtlung zawk siamsak turtein a ngen a ni.

Narendra Singh Tomar chuan, horticulture lama Mizoram mamawhte chu tihhlawhtlin sak a tum thu leh official-te nen an lo en zui tur thu a lo hrilh.

Prof. F Lalnunmawia hian ICAR deputy director general (Horticulture) Dr Anand K Singh leh assistant director general Dr BK Pandey te a kâwm bawk a, horticulture-a Mizoram hmachhawpte a sawipui a ni.