Tluang leh felfai takin inthlan kan zo - Kolasib DEO
Kolasib district election officer (DEO) Dr H Lalthlangliana, bawrhsap chuan nimin khan a pisaah thuthar thehdarhtute a kâwm a; tluang tak leh felfai takin Tuirial bial MLA by-election neih zawh a nih thu a sawi.
Dr H Lathlangliana chuan, by-election-a thlan tlin tâk K Laldawngliana lawmpuina hlânin, "Rim taka beitu hlawhtlinna chang ve ta lote pawh hnual mai lo a, an hma lam huna ram leh hnam tana pên chhuak zel turin duhsakna ka hlan a, an tling zo ta lo erawh ka tawrhpui tak zet," a ti.
Sorkar official, MPF leh Covid-19 kaihhnawih avanga duty YMA-te vangin inthlanna thianghlim leh felfai tak a awm theih thu sawiin H Lalthlangliana chuan, "Political party-te pawh nasa takin inbei mah se, state dang angin tharum thawhnate a thleng ve lote hi a lawmawm tak zet," a ti a; khauh taka an duty karah political party-te pawhin thu an âwih a, ṭawngkam mawi lo official-te an hman khum loh thu a sawi.
Kolasib DEO chuan, Tripura-a Bru-te vote thlak dan turah ECI an ngaihchàn reng thu sawiin, "ECI-in Mizo mipui duh dana special polling station emaw ballot paper a siam lo hi a lawmawm tak zet. Tripura aṭanga vote rawn thlak an awm lo a, Bru refugee, Mizoram electoral roll-a la chuang Hortoki-a inbéngbel tawh mi pathumin an thlak thung," a ti.
Kolasib Bawrhsap chuan, an district-ah Covid-19 vei an tlakhniam sâwt thu sawiin, "Ni 10 kal ta kha chuan positive rate 2.4% a ni a, inthlanna bialah erawh hripui kái an pung thar," a ti a; hripui a darh zel lohna atan a sahâwk zawnga chak lâwm lo turin mipui a ngen a ni.