Scholarship cheng nuai 1,000 pe chhuak

Higher & Technical Education minister Dr R Lalthangliana chuan, Post Matric Scholarship second instalment atan Ministry of Tribal Affairs (MoTA) chuan nimin tlai khan cheng nuai 1,000 chuang a rawn pek chhuah thu a puang a, zirlaite'n a hma thei ang bera an dawn theih nan hma an la dawn tih a sawi.

Dr R Lalthangliana chuan, Post Matric Scholar­ship chungchanga harsatna awm mek chinfel a nih thu sawiin, "Kum kal taa Post Matric Scholarship second instalment sorkar laipuia MoTA-in an rawn release loh chu vawiin tlai khan an release a, sanction order pawh kan hmuh nghal a ni," a ti.

Post Matric Scholar­ship buai chungchangah Mizoram sorkar thiam loh a awm loh thu leh MoTA lam pawhin an tihsual palh liau liau a ni tih an pawm thu sawiin, R Lalthangliana chuan, "Kum kal ta 2020-21 khan post-matric scholarship first instalment an rawn release hnuah second instalment an rawn release leh tura ngaih a nih laiin kumin kum kal lai mek 2021-22 a mi tur first instalment tur cheng nuai 1,300 chuang an rawn sanction leh ta daih mai a, hei hi Finance department-ah allocation turin thehluh fel vek tawh a ni," a ti a; state matching share pawh Planning department-ah dil tawh niin, rei lo têah peih beisei a nih thu a sawi.

HTE Minister chuan, MoTA lamin nikuma mi tur second instalment sanction hmaa kumina mi tur first instalment an sanction tih an hriat veleh a theih anga ranga an bawhzui thu te, amah ngei pawhin lehkha bakah telephone hmanga Ministry hotute vawi duailo a biak thu te, kar hmasa lamah pawh Mizoram Scholarship Board-a officer-te ûm zui tura an intirh thute a sawi a, "Ministry lam pawhin an tihsual palh liau liau tih hriain an ngai pawimawh hle a, rang taka bawhzuiin, vawiin tlai khan cheng nuai 1,000 chuang an rawn sanction nghal a ni," a ti.