Hmeichhe dikna chanvo zirho a ni

Mizoram State Legal Services Authority, High Court Legal Services Committee, Gauhati High Court, Aizawl Bench leh Aizawl District Legal Services Authority-te chuan National Commi­ssion for Women leh National Legal Services Authority ruahmannain nimin khan Aijal Club-ah hmeichhiate dikna chanvo chungchanga dan lam zirhona 'Legal Awareness Campaign on Womens Right' an buatsaih.

Zirhona hi Gauhati High Court judge pahnih - Justice Michael Zothan­khuma, Mizoram SLSA executive chairman ni bawk leh Justice Nelson Sailo, Gauhati High Court Legal Services Committee chairman ni bawkte'n an hmanpui a ni.

Justice Michael Zothan­khuma chuan, Mizo­ram-ah mipa aiin hmeichhe dinhmun chhe deuh zawka a lan laiin, kawng tam takah hmeichhiate'n hma an hruai tawh zawka a lan thu a sawi a, "Hmeichhiate dikna chanvo humhalhsak hi khawvel pumah ngaih pawimawh a ni a, Mizo hmeichhiate'n hnam dang pasala an neih loh nan mipate'n ṭan lak a ngai hle," a ti.

Justice Nelson Sailo chuan, mi tu pawh dan hnuaia léng an nih thu sawiin, "Dan hi tute pawhin kan hriat a ngai a ni. A bik takin dan hian hmeichhiate a humhalh nasa lehzual emaw tih mai tur a ni," a ti a; hmeichhiate humhalhna dan chi hrang hrang siam a nih tawh thu leh chu'ngte chu hriat chian a ṭul thu a sawi.

Resource person Lalngaihsaki Fanai, advocate chuan hmeichhe humhalhna dan hrang hrang a sawifiah a; resource person dang Lalrinnungi Sailo, advocate-in The Mizo Marriage, Divorce and Inheritance of Property Act, 2014 a sawifiah bawk.

Zirhonaah hian Mizoram State Commission for Women, Mizo Hmeichhe Insuihkhawm Pawl, Mizoram Law College zirlai, Mizoram Flourist Association, Legal Aid Counsel, Mizoram Bar Association leh sorkar official eng emaw zat an tel a ni.