School Education department leh Reckitt & Plan India thawkho dawn

School Education department leh Reckitt & Plan India chuan nimin khan naupang leh tleirawlte theihna hâi chhuah te, nun kawng dik leh khawtlang tana mi ṭangkai an nih theih nana inzirtirna kalpui turin thawhhona thuthlung an ziak.

Memorandum of Understanding-ah hian Mizoram sorkar aiawhin School Education secretary Dr Lalzirmawia Chhangte-in hming a ziak a, Reckitt & Plan India aiawhin chief of party Dr Komal Goswami-a'n hming a ziak. Dr Lalzirmawia Chhangte hian project a tlangzarh nghal bawk.

Project-in a tum ber pakhat chu, naupangte theihna hâi chhuah te, nun kawng dik leh khawtlang inrêlbàwlnaa inhmantir te, tleirawlte nun kawng dik an zawhna theihna tura khawtlang tana mi ṭangkai an nih theih nana inzirtirte a ni a; hmarchhak state paruka naupang 2,00,000-te tana hmalak a ni.

Sorkar thuchhuah tarlan danin, kum 2017-a Durex-in khawvel puma mipat hmeichhiatna kawnga zirchianna a neihna aṭangin India ramah comprehensive sexuality education (CSE) neih a la ni ngai lo tih an hmuchhuak a; sikul curriculum-ah pawh telh a nih loh avangin zirtirtu leh nu leh pate'n hemi chungchangah hian naupangte an kaihruai thiam loa tarlan a ni.

Inzirtirna an kalpui thiam loh avangin naupangteah inkiltawihna leh inthlahrunna a nasa a, naupangte'n an harsatna an sutkian a, an puitlin huna duhthlanna hrisel zawk an neih theih nan project hi an zirlaia a tel ang chiaha kalpui tura ruahman a ni. Zirnaa telh turte chu offline leh e-Learning pawha kalpui tum a ni.