KHAWTHLIR

Kuhva rah man
Assam Rifles leh Champhaia Customs department mite chuan nimin khan Ruantlang area-ah kuhva rah ip 665 an man a, Customs department hnenah an hlân. Kuhva rah an man hi Rs 2,07,48,000 hùa chhût a ni.

Restricted area
Aizawl district bawrhsap Dr Lalhriatzuali Ralte chuan, Tanhril Mualkhang rama SIPMIU Water Centre chu restricted area-ah a puang a, thla hnih chhung a huam ang. Hei hi SIPMIU-in Tanhril Mualkhang rama Water Treatment Plant an siam avanga chhiatna leh chetsualna thleng palh thei leh Covid-19 inkài darh palh awm thei vênna atana tih a ni.

Inkhawm hun
Kolasib district magistrate Dr H Lalthlangliana chuan, Covid-19 inkaihhruaina thara kohhran inkhawm theih hun, chhûn leh zan tia tarlan chu Kolasib district tan chhunah leh Pathianni zanah tiin a thlak. Hei hi thu leh awm hma chu hman tur a nih thu a tarlang.

Thisen pe
Catholic Ṭhalai Pawl, Aizawl chuan nimin khan Aizawl Civil Hospital tan thisen unit 71 an pe a, petute mipa 63 leh hmeichhia pariat an ni.

Tlawh theih loh
November 5, 2021 khian National Legal Services Authority executive chairman Justice Uday Umesh Lalit, Supreme Court judge ni bawkin Reiek tlangah cleanliness drive leh legal awareness campaign a buatsaih dawn avangin, hemi hun chhung hian mipui vantlang tan Reiek tlang tlawh theih a nih dawn loh thu Mamit DC Dr Lalrozama chuan a puang.

Home enfiah
Lawngtlai District Child Protection Committee (DCPC) chuan nimin khan additional DC James Miahlung hoin Lawngtlaia naupang enkawlna hmun Lairam Motherless Home leh Lawngtlai Observation Home an tlawh a, an dinhmun leh mamawhte an enfiah. Motherless Home-ah naupang 21 leh Observation Home-ah naupang pahnih an awm mek a ni.