India rama Covid-19 hmuh belh tamna ber pathumna Mizoram

Mizoram chu November 1, Thawhṭannia Covid-19 vei hmuh chhuah tam lamah India rama state leh union territory 36 zingah pathumna a ni a, Mizoram aia hmuh tamna state pahnih chiah a awm. Hmarchhak state-ah hripui vei hmuh belh tam berna a ni zui zel bawk.

Nimin zing dar 8-a sorkar laipuiin Covid-19 report a tihchhuaha a lan danin, November 1-a Mizoram aia Covid-19 positive hmuh chhuah tamna state-te chu Kerala (mi 5,297) leh Tamil Nadu (mi 990)-te an ni a; Mizoram (mi 830) chu pathumna a ni.

Hripui vei enkawl mek (active case) tam lamah Mizoram chu India ramah parukna a ni a; Mizoram aia active case tamnate chu - Kerala 77,399, Maharashtra 19,175, Tamil Nadu 11,309, Karnataka 8,541 leh West Bengal 8,146-te a ni a; Mizoramah 6,484 an awm.

India hmarchhak state pariat zingah Mizoram chu Covid-19 vei hmuh chhuah thar leh enkawl mek tamna ber a ni zui zel a; Mizoram state pariata hmuh chhuah zat 1,278 zinga a zatve aia tam mi 830 (64.95%) chu Mizorama hmuh a ni. Mizoram ringawt hmuh belh zat hi hmarchhak state dang pasariha hmuh zat 448 aiin 382-in a tam zawk.

Hmarchhak state pumah Covid-19 vei enkawl mek mi 11,875 an awm a, chu'ng zinga a zatve aia tam mi 6,484 (54.60%) chu Mizorama mite an ni a, hmarchhak state dang pariata active case 5,391 aiin Mizoram bika active case 1,093-in a tam zawk a ni.

Covid-19 vei hmuh chhuah tawh aṭanga enkawl mek zat percentage-ah Mizoram dinhmun tlahniam viau tawh mah se ram pumah a la sang ber a, Mizoramah active case 5.30% awmin, a dawttu Kerala-ah 1.56% an awm a; state leh UT dang zawng chu 1% aia hniam vek a ni tawh.

Hmarchhak state pariatah mitthi thar 13 an awm a, Assam-ah pasarih, Mizoram, Manipur leh Maghalaya-ah pahnih ṭheuh an awm a; Tripura, Arunachal Pradesh, Sikkim leh Nagaland-ah thih belh an awm lo.