Eptu party-te'n K Laldawngliana an lawmpui

Eptu party hrang hrangte chuan Tuirial Assembly constituency by-election tluang taka zawh a ni chu lawmawm an tih thu leh thlan tlin tak K Laldawngliana, MNF candidate an lawmpui thu, thuchhuah siamin an tarlang.

Congress party chuan, by-election tluang taka neih a ni chu lawmawm an tih thu sawiin, "Inthlanna buaipuitu official-te leh MPF te, INC candidate Pu Chalrosanga Ralte vote-tute zawng zawng chungah lawmthu kan sawi a ni," an ti a; thlan tlin tak K Laldawngliana an lawmpui thu sawiin, inthlan hman Tuirial bial tana an thutiamte tihlawhtling ngei turin duhsakna an hlân tih an sawi.

By-election-a ṭhahnemngai taka thawktu Congress party mi leh sate zawng zawng an chhuan thu sawiin MPCC chuan, "General Election 2018-a na taka kan tlak hnu kum thum lek chhungin by-election vawi thum kan hmachhawnna a ni a, kan vote hmuh zat enin Congress party-in ruhrel lian tak kan nei a, kan tla zawi lo a ni tih a chiang hleah kan ngai," an ti.

ZPM president Lalliansawta chuan nimin khan press statement tichhuakin, Tuirial by-election-a thlan tlin K Laldawngliana an lawmpui thu a tarlang a, "Tuirial bial mipui tan MLA ṭangkai tak a nih ngei ka beisei," a ti a; K Laldawngliana chu ZPM hminga lawmpuina chibai a bûk thu a sawi.

Lalliansawta chuan, ZPM candidate Laltlanmawia a tlin theihna tura thawktute zawng zawng chungah leh vote petute zawng zawng chungah lawmthu a sawi a, "Campaign chhungin boruak duhawm lo lian tham awm loa inthlanna kan tlingtla ta hi lawmawm ka ti em em a, MPF-in inthlanna felfai leh thianghlim tak kan neih theihna tura hma an laknaah lawmthu ka sawi a ni," a ti.

ZPM President chuan, an party naupang tê, kum 4 vel leka upa a ni tih sawiin, "Inthlan hrang hrang kan hmachhawn tawh a, chu'nga kan dinhmunte enin min hruaitu Pathian hian kan chapo lutuk tur min beng hniam a, kan beidawng lutuk turah min chawi kâng leh a ni," a ti a; ram rorelna atan 'Kalphung thar, Mipui sorkar' ṭha taka an kalpui theihna atan inthlanpui atana tun kum hnih la awmah training an la mamawh nia a ngaih thu a sawi bawk.

BJP, Mizoram Pradesh chuan thuchhuah siamin, K Laldawngliana an lawmpui tak zet thu an tarlang a, "Tuirial bial tan malsawmna thlentu ni a, bial tana tih tur an intiam angte an tlin chhan pakhat a nih avangin an tihsak ngei kan beisei a ni," an ti.

Mizoram BJP hian Tuirial bial by-election-a BJP tana theihtawp chhuaha hmalatute chungah lawmthu an sawi a; Mizorama an awm chhan ang takin, Mizoramin hmasawnna kawng dik a zawh theihna turin chak takin hma an la chhunzawm zel dawn tih an sawi bawk.

Peoples Conference (PC) party pawhin Tuirial bial by-election-a thlan tlin K Laldawngliana an lawmpui tak zet thu an tarlang a, "Ram leh bial mipui tana theihtawp chhuah turin duhsakna kan hlan. Hlawhtling zo ve ta rih lote kan tuarpui a, inpekna thûk zawk nena ram tana hma lam pana pên zel turin duhsakna kan hlan bawk," an ti.