MNF party-in lawmthu an sawi

MNF party chuan thuchhuah siamin, Tuirial Assembly constituency by-election-ah an candidate K Laldawngliana thlan tlin a ni chu lawmawm an tih thu an tarlang.

MNF chuan, Tuirial bial by-election-ah vote a thla ṭha tih sawiin, "Vote chhiar zawh a lo ni ta a, Pathian leh mipui zarah MNF candidate Pu K Laldawngliana chu hneh taka thlan tlin a lo ni ta a, MNF chuan lawmawm kan ti tak zet. Amah hnaih bertu nen an inthlauhna vote 1,283 lai a ni a, kum 2018 inthlanpui aiin vote 1,636 zeta hma kan sâwn hi a lawmawm kan ti a, Pu K Laldawngliana kan lawmpui hle," an ti.

By-election-a an chak theihnaah Tuirial bial mipui thawhrimna leh theihtawp chhuahnaah an lawm tih sawiin MNF chuan, "Kan tlin theihna tura MNF hruaitute leh party worker zawng zawngte thawhrimna leh theihtawp chhuahnaah lawmthu kan sawi nghal a ni," an ti a; inthlanna felfai leh tluang taka neih a nih theihna tura sorkar lam official duty, police, MPF leh YMA-te chungah an lawm tih an sawi bawk.