ASF vangin vawk 29,683 thi tawh

Vawk pùl hri, African Swine Fever (ASF) avangin nimin thleng khan Mizoramah vawk 29,683 a thi tawh a, khua/veng 271-ah ASF a léng tih finfiah a ni tawh. Nimin bikah ASF vangin vawk pariat a thi.

Animal Husbandry & Veterinary department tarlan danin, nimin thleng khan ASF infected area hrang hrangah vawk 10,190 suat a ni tawh a, ASF lênna nia rinhlelh khua/veng pasariha vawk 190 suat tawh nen a vaia vawk suat tawh chu 10,380 a ni. Nimin thleng khan ASF infected area-a puan ni lo khua/veng 95-ah chhan hriat loa vawk thi 515 a awm tawh.

Aizawl district chu ASF infected area leh ASF vanga vawk thi tamna ber a ni a, Mizoram puma infected area 271 zinga 112 (41.32%) leh vawk thi zawng zawng 29,683 zinga 12,277 (41.36%) chu Aizawl district-a mi a ni.

Serchhip district chu ASF vanga vawk suat tam berna district a ni a, Serchhip district-a ASF infected area 35 zinga 30-ah nimin thleng khan vawk 3,040 suat a ni tawh.

Serchhip district-a Thenzawl khua chu Mizorama ASF vanga vawk thi tam berna khua a ni a, nimin thleng khan Thenzawl khuaah vawk 921 a thi tawh a, vawk 615 suat a ni tawh bawk.

Mamit district-a Léngte khua chu ASF vanga vawk suat tam berna khua a ni thung a; Lengteah hian vawk 2,033 suat tawh niin, hei hi Mizoram puma vawk suat tawh zat 10,380 aṭangin 19.58% a tling.

Chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin AH&Vety department chuan mipui an ngen a ni.