Lungleia lei tlahniam siam dan tur sawiho

Lunglei DC Kulothungan A kaihhruaiin November 1, Thawhṭanni khan Lunglei District Committee on Preparation of Detailed Project Report (DPR) for Site Specific Landslides Risk Migitation chu an ṭhukhawm a; Lunglei College Venga lei tlahniam siam dan tur an sawiho.

June 2019-a ruahsur nasa avangin Lunglei College Vengah lei tlahniam a awm a, chhungkua 12 chenna in pasarih rauhsan a ni. Lunglei District Disaster Management Authority-in North Eastern Council (NEC)-ah siamṭhatna tur detailed project report (DPR) a thehlut a, mahse hnâwl a ni.

Committee-ah hian Lungleia disaster kaihhnawih department hrang hrangte'n National Disaster Management Authority dan siam zûlzuia DPR siam turin hmanraw ṭha an neih loh avangin private consultancy rawih ni se an ti a, a ṭul angin Committee hian a pui dawn a ni.