COVID-19: Mizoram dinhmun ; Hripui vei 830 hmuh belh a ni
November 1, Thawhṭanni khan Mizoramah Covid-19 vei mi 830 hmuh chhuah a ni a, Thawhṭannia Covid-19 vei hmuh chhuah tam lamah India ramah pathumna a ni. Nimin khan hripui vei dam tawh mi 420 chhuahtir an ni a, hripui vangin nimin chhun lamah thi an awm lo.
Covid-19 vei Thawhṭannia hmuh tharte chu ZMC laboratory-a hmuh chhuah mi 185, TrueNAThmanga hmuh 66, RAT hmanga hmuh 565 leh Fluorescent Immunoassay (FIA) hmanga hmuh mi 14 an ni a; mipa 373 leh hmeichhia 457 an ni.
IDSP record angin, Mizoramah Covid-19 vei 1,22,354 hmuh chhuah a ni tawh a, mipa 59,462 leh hmeichhia 62,892 an ni, mipa aiin hmeichhia 3,430-in an tam zawk. Nimin tlai dar 5 thleng khan mi 1,15,885 (94.69%) chhuahtir an ni tawh a, mi 435 (0.36%) thi tawhin, enkawl mek mi 6,064 (4.95%) an awm.
November 1, Thawhṭannia hripui vei hmuh chhuah thar mi 830-te chu symptom nei 405 leh nei lo 425 an ni a; tualchhunga kái 828 leh state pawn aṭanga rawn lut pahnih niin, tualchhunga kai zingah hri an kàina chin hriat loh mi 426 an awm.
Swab sample endik aṭanga Covid-19 positive hmuh zat percentage (positivity rate)-ah Siaha district chu 66.30% a ni a, Serchhip district-ah 58.88% leh Khawzawl district-ah 52.17% a ni bawk. Siaha leh Khawzawl district hi a hma ni, Pathiannia sample endik awm lohna a ni a, Siaha district phei chu a hma ni hnih chhung sample endik awm lohna a ni.
Kum 2011 chhiarpui aṭanga chhûtin, Mizorama Covid-19 vei hmuh tawh 1,22,354 chu mi 1,000 zelah hripui vei mi 111 an awm ang a ni a; mi 1,00,000 zela Covid-19 vangin mi 39 an thi tawh ang a ni. Nimin khan tlai dar 5 thlengin hripui vei dam tawh mi 420 chhuahtir an ni a; Aizawl district-ah mi 282, Champhai district-ah 39, Lunglei district-ah 38, Lawngtlai district-ah 26, Mamit district-ah 17, Siaha leh Kolasib district-ah pariat ve ve leh Khawzawl district-ah pahnih an chhuak.
