Citizenship (Amendment) Bill-ah sorkarin a ngaihdan chiang takin tilang rawh se - Joint Meeting

Law & Judicial minister Lalsawta hoin nimin khan a pisaah sorkar official, NGO Coordination Committee, political party-te leh Mizoram Kohhran Hruaitute Committee (MKHC) aiawhte an ṭhukhawm a; 'Sorkarin Citizenship (Amendment) Bill, 2016-ah a ngaihdan chiang takin tilang rawh se,' an ti.

Vanglaini thu dawn danin, nimina mee­ting-ah hian India hmarchhak state hrang hranga sorkarte chuan sorkar laipuiin Citi­zen­ship (Amendment) Bill, 2016 a ruahman chungchangah ngaihdan nghet leh dinna nghet an neih tawh thu sawi chhuah a ni.

Mizoram sorkar pawh dinna nghet nei ve se an duh a, Bill hi a duh a nih chuan a duhna tilang se, a duh lo a nih chuan a duh loh thu tilang turin meeting chuan Mizoram sorkar an phût. Sawiho a nih hnuah, 'Sorkarin Citizenship (Amendment) Bill, 2016-ah a ngaihdan chiang takin tilang rawh se' tiin thu an dah.

Joint NGO aiawhte chuan, Citizenship (Amendment) Bill chu an duh loh thu an lo tlangaupui ṭhin tawh bakah, Bill an duh loh thu Prime Minister, Union Home Minister leh sorkar laipuiin Bill zir chiangtu atana a ruat Joint Parliamentary Committee for Citizenship (Amendment) Bill Chairman hnenah an thlen tawh thu an tarlang.

MKHC aiawhte chuan, MKHC ang chuan Citizenship (Amendment) Bill an la sawiho loh thu an sawi a; mimal ang chuan an duh loh thu meeting-ah an thlen thung.

ZPM leh PRISM aiawhte chuan, an party chuan Citizenship (Amendment) Bill chu an duh loh thu an sawi a; MPCC (Congress party) aiawhte chuan an party angin Bill hi an la sawiho loh thu sawiin, "Mimal ang chuan Bill hi kan duh lo," an ti. MNF aiawh erawh meeting-ah hian an tel lo.

Citizenship (Amendment) Bill, 2016 hi a him loa ngaiin, India ram hmun hrang hrangah duh lohna lantir a lo ni tawh ṭhin a, tun hnaiah pawh hmarchhak zirlai pawl intêlkhawmna, North East Students Organisation (NESO) bultumin hmarchhak state zawng zawngah Bill duh lohna lantir a ni.