Inremna tihpuitlin phûtin chaw nghei

Mizoram Underground Returnee Association (MURA) chuan, Mizo­rama sorkarna chelh mektu Mizoram Pradesh Congress Committee (MPCC) nena inremna an siam tihpuitlin phûtna atan June 6, Nilaini tlai aṭang khan an pisaah chaw an nghei ṭan. An thil phût a hlawhtlin hma chu chaw nghei an tum niin an sawi.

MURA hruaitute sawi danin, kum 1998 leh kum 2013 MLA inthlan dawnah Congress party-te nen inremna an siam a ni. Chaw an nghei chhanah hian, MURA-te hian sorkarin tihlawhtling se tih point pali an nei a; chutih laiin, MPCC chuan MURA hnenah hian lehkhathawnin, an thil phût point pahnih chu sorkar kalphung pangngaiah tihhlawhtlin theih a nih loh thu an hrilh.

Tunah hian MURA member 15-in chaw an nghei mek a; an member chaw nghei duh tam tak awm mah se, an pisaa leng tâwkin chaw an nghei phawt hrih tih MURA hruaitute chuan Vanglaini palai an hrilh.

MURA thil phûtte
1) MPCC & MURA agreement angin, MURA member in hmun neite in sak ṭanpuina cheng nuai 20 ṭheuh sorkarin min pe rawh se.
2) MPCC & MURA agreement angin, sorkar hna 4th. grade aṭanga LDC thleng (MRHG telin) ram puma MURA member tu leh fate tan post 200 sorkarin min pe rawh se.
3) Contract/ immediate relief MURA-te intuam hlâwm nan sorkarin min pe rawh se.
4) NLUP a rang lamin ram puma MURA-te min sanction rawh se.
(Note: Pakhatna leh pahnihna hi MPCC-in tihhlawhtlin theih loa an ngaih a ni)