Chief Minister-in Bairabi-a Tlawng lei thar a hawng

Bairabi-a Tlawng lei (pre-stressed concrete bridge) dawh thar chu June 6, Nilaini khan chief minister Lal Than­hawla'n a hawng.

He lei hi Mizoram PWD-in Mizoram chhunga RCC lei an dawh zinga a sei ber a ni a, Mizorama lei sei ber dawttu a ni bawk.

Chief Minister chuan, Tlawng lei thar chu Mamit leh Kolasib district inkalpawhna pawimawh a nih thu sawiin, lei hmang­in Mamit district tan châk-khai lak luhna leh thil hralh chhuahnaah kawng zau takin a inhawn phah dawn thu a sawi a, "Rel kawng lian nen a inthlun zawm tawh avangin hun rei lo têah Bairabi hian hmasawnna nasa zawk a hmu dawn a ni," a ti.

Mizoramah hmasawn­na ruhrel, kawng ṭha leh lei ṭha siam zel a ni tih sawiin CM chuan, "Kut hnathawktute pui turin agricultural link road pawh tam zawk siam zel a ni a, tuna link road-te pawh all weather road-a siam vek tum a ni," a ti a; chu chu Mizoram economy ṭhanna belhchhahtu tur a nih thu a sawi.

PWD minister Lal Thanzara pawhin thu sawiin, Bairaibi Tlawng lei leh June 5-a hawn tâk Tut leite chu Kolasib leh Mamit district pumpui tan malsawmna a nih thu a sawi.

Tlawng lei thar hi NEC aṭanga sum hmuh cheng nuai 1413.03 senga dawh a ni a, NEC-in 90% tumin, Mizoram sorkarin 10% a tum. Lei hi metre 7.50-a zau, meter 160 (ft. 525)-a sei a ni a, a sir tawn tawnah kea kalna (footpath) metre 1.50-a zau ve ve siam a ni. Leiin a dâwl chin (load capacity) chu 70R a ni.

Lei dawhtu chu ABCI Infrastructure Pvt.Ltd. niin, June 28, 2008-ah dawh ṭan a ni a, kum 2 vela zawh tura tih a ni a, dawh ṭan aṭanga kum 9 ral hnu, January 31, 2018-ah a tira senso tura ruahman let aia tam senga dawh zawh a ni.