MIGLAHSSA-in Demand Day an hmang ; HSS pakuaah zirtirtute'n lehkha an zirtir lo

Mizoram Govt. Lump­sum Grant-In-Aid Higher Secondary School (MIGLAHSSA) chuan adhoc aided-a hlangkai tura sorkar phûtin nimin khan Demand Day an hmang a, MIGLAHSSA-a tel higher secondary school pakuaah zirna kalpui a ni lo.

MIGLAHSSA-ah hian higher secondary school pakua - Phullen HSS, Thing­sulthliah HSS, Tui­sual­ral HSS, Zobawk HSS, Farkawn HSS, NE Khawdungsei HSS, East Lungdar HSS, West Phaileng HSS leh Zawlnuam HSS-te an tel a; sikul pakuate hian Demand Day an hmang vek a, zirlaite attendance chauh lain, lehkha an zirtir lo a ni.

MIGLAHSSA chuan, an member sikulte chu khawtlang enkawl mek a ni a, mamawhna a san em avanga khawtlangin kum 2004 leh a hma lama an dinte a nih thu sawiin, "Kum 14 chuang khawtlangin sum leh pai thawhkhawmin an enkawl tawh a, vawi eng emaw zat sorkar thunei­tute hnenah dinhmun ṭha zawka dah ve tura ngenna kan thlen tawh chungin sorkar aṭangin thu lawm­awm kan la hmu lo," an ti.

MIGLAHSSA tarlan danin, dinhmun ṭha zawka hlankai beiseiin kum 2013-ah sikul khârin sorkar an nawr tawh a; sorkar hotute erawh chuan sum lama harsatna vangin adhoc status-a hlankai a harsat thu te, sum dinhmun ṭhat veleh ngaihtuah an nih tur thutein an chháng a ni.

Zirlaite hmakhua an ngaihtuah avang leh sorkar sum leh pai dinhmun hriatpuiin pangngai takin sikul an kal leh a, mahse, kum li chhung ṭhahnemngai taka naupangte an zirtir hnuah pawh sorkarin adhoc status-ah hlankai a tum lo nia a lan thu sawiin MIGLAHSSA chuan, "Private HSS dangte nen lumpsum grant-in-aid category khatah dah a tum avangin sikul tina managing board-te hriatpuina leh remtihpuinain Demand Day hi hman a ni ta a ni," an ti.

An tarlan danin, MIGLAHSSA-a tel sikul pakhat zelin zirtirtu hlawh atan ringawt tun thlengin cheng nuai 60-80 vel ṭheuh an sêng tawh a, chu'ngte chu mipui thawh khawm a ni.

MIGLAHSSA member sikul pakuaah hian HSSLC 2018 exam-ah khan zirlai 435 exam in, 422 an pass a, pass percentage chu 90.05 a ni a; disntinction-ah 10, 1st. division-ah 97, second division-ah 180 leh third division-ah 96 an pass. Tunah hian zirlai 850 chuang an awm mek.