ZPM hruaitute Lawngtlai-ah

Ṭangrual pawl, Zoram People's Movement (ZPM) hruaitute chuan nimin khan Lawngtlai Areopagy-ah vantlang inkhawm an buatsaih a,

Lawngtlai Press Club-ah thuthar thehdarhtute an kâwm bawk a; ZPM-in sorkarna an siam huna an hmalak dan turte an sawifiah.

Areopagy-a vantlang inkhawmah hian ZPM chief ministerial candi­date Lalduhoma leh MPC president Lalhmangaiha ten thu an sawi a, "Kum 2018 Mizoram MLA inthlanah ZPM-in sorkarna kan siam ngei dawn a ni," an ti a; sorkarna an siam huna an hmalak dan turte an sawifiah a ni.

Thuthar thehdarhtute an kawmnah Lalduhoma chuan, 15th Finance Commission-ah a hranpaa district council leh village council sum hman tur dil a nih tur thu sawiin, "Thingtlang lo neih hi bànsan ngawt theih a ni lo a, loh theih loha lo neite chu kan enkawl zui dawn a ni," a ti.

Lalduhoma chuan, ṭhalaite tan khawvel thar buatsaih an tum thu sawiin, "Ṭhalaite'n anmahnia eizawnna nghet an neih theih nan bank loan pek chhuah a, khuarel chhiatna an tâwk a nih pawha enkawl zui zelna tur scheme siam kan tum," a ti a; rintlak project neite lakah sorkar chu guarantor-ah a ṭan tur thu a sawi.

ZPM CM Candidate chuan, sorkarna an siam a nih chuan VIP culture tihbo hmak a nih tur thu sawiin, "CM Relief Fund hmanna tlangzarh a ni ngai lo hi ṭha lo kan ti. Sor­kar chu langtlang sor­kar a ni tur a ni," a ti.

Zawhna chhangin Lal­duhoma chuan, Kaladan Multi Modal Transit Transport Project-a zang­nadawmna diltu an pung hluai chhanah a tìr aṭanga tih tur sorkarin a tihfel tawk loh vanga a ngaih thu a sawi.