KHAWTHLIR

MBBS seat
Mizoram sorkar chuan thuchhuah siamin, Mizorama medical college din thar, MIMER-a MBBS seat ṭhen hrang hranga Mizoram quota 70% chang tur chu Higher & Technical Education department-in exam a buatsaih hmanga thlan tur a nih thu a tarlang. Mizoram quota baka la bâng 30% aṭangin 15% ve ve chu Central Pool leh non-resident Indian (NRI) quota tur a ni.

Lungphun hawng
Thingdawl khaw dintu an lal, Peter Vanhnuaia Sailo hriatrengna lungphun chu nimin khan chief minister Lal Thanhawla'n a hawng. Chief Minister chuan, Thingdawl khaw dintute hriatrengna lung phun nacháng an hria chu lawmawm a tih thu sawiin, "Hetianga mi hmasa leh mipuite tana sûlsutute nghilh loh nachang hriat hi mi changkang zia a ni," a ti.

V/C bye-election
Mizoram State Election Commission chuan June 26, 2018-ah Lawngtlai district-a village council (V/C) pathumah bye-election a buatsaih dawn. Hemi chungchangah hian SEC chuan nimin khan hriattirna a tichhuak a; bye-election buatsaihna turte chu - Ngengpuikai, Thingkah leh Damlui khuate a ni a, V/C ṭhiah vang leh member thi an awm vangtein bye-election buatsaih tur a ni.

Thisen pe
Tuikual North Branch YMA chuan YMA Day lo thleng tur pualin nimin khan an hall-ah blood donation camp an huaihawt a, Aizawl Civil Hospital tan thisen unit 47 an pe.

Zirlai puih tum
MSU chuan thuchhuah siamin, academic session thar atan higher secondary school leh college-a admission tih kawngah zirlai eng emaw zatin harsatna an tawk nia an hriat avangin, a ṭul anga hmalak an tum thu an tarlang. MSU hian pawl 11 emaw, college emaw zir zawm ngei duh, admission-a harsatna tâwkte chu June 14, 2018 ral hmain MSU pisaa inhriattir turin an chah a, "Zirna in hrang hranga seat awm dan a inan loh avangin, sikul/college duh bik nei tlatte erawh puih a harsa dawn a, chutiang case chu kan khawih thei dawn lo," an ti.