Bawlhhlawh motor man a to uchuak lo - SIPMIU

SIPMIU chuan thuchhuah siamin, bawlhhlawh paih motor (garbage vehicle) an leina a to uchuak hle nia sawi chungchang an sawifiah a; "Bawlhhlawh motor leina hi motor dang man nena khaikhina to uchuak anga sawi hi hriat sual palh niin a lang," an ti.

Bawlhhlawh motor supply-tu tur zawn nan tender chhuah a ni a, eng motor/vehicle manufacturer tan pawha chhan theih tura duan a nih thu SIPMIU chuan an sawi a, "Motor supply tur hian a hmaa bawlhhlawh paih motor, a bikin bawlhhlawh phurhna atan a body siam lo supply tawh ṭhin tur a ni tih qualification criteria-ah dah a ni," tiin an tarlang.

SIPMIU tarlan danin, tender chu Zothan Auto Works, Aizawl (TATA Motors) leh TPS Infrastructure Ltd., New Delhi (Joint Venture)-te leh SML Isuzu, Chandigarh ten an chhang a; Zothan Autoworks - TPS Infrastructure chhanna chauh a nun avangin anni hi thlan a ni.

Zothan Autoworks - TPS Infras­tructure ten tender an chhanna zat chu motor pakhatah Rs. 18,90,000 (tax leh warranty kum 3 telin) a ni. Garbage vehicle carrying capacity chu cubic meter (cum) 3.5 a nih laiin, TATA 407 LKP truck pangngai capacity chu 3 cum a ni tih sawiin, "LPK 407 pangai man nena khaikhin chi a ni lo," an ti.

Garbage vehicle to chhan an tarlante

1. Garbage vehicle LPK 407 carrying capacity 3.5 cum a nih laiin LPK 407 pangngai capacity chu 3 cum a ni.

2. Garbage vehicle PTO hydraulic pump hi LPK 407 vehicle pangai aia tihlen a ni.

3. Garbage vehicle-ah hian a body a len avangin a chassis double-a siam a ni.

4. Tipping cylinder leh spool valve a bika siam a nih vangin a to.

5. Garbage vehicle body (a chung telin) hi kahpathir milimeter 4-a chhaha siam a ni a, LPK 407 pangngai chu milimeter 3-a chhah a ni a, a chung khuhna a tel lo bawk.

India hmachhaka bawlhhlawh motor supply tawh ṭhin Kamrup Construction, Guwahati leh Ariamrit Engineering Ltd., Kolkata-te supply-na rate-ah pawh pakhat man chu Rs. 20,26,879 leh Rs. 26,94,300 a nia sawiin, "Bawlhlawh motor chassis hi Mumbai aṭanga lak chhoh niin, Zothan Autoworks-in a thawhpui TPS Infrastructure, New Delhi workshop-ah a body sak a ni," an ti.

Motor hring leh pawl man inan loh chhan an tarlante

1. Motor hring 3.5 cum capacity-a siam chu Aizawl a thlen hnuah bawlhhlawh tam zawk a phurh theih nan motor body tidanglam duhna AMC leh sorkar hotute aṭanga a awm avangin siam danglam leh a ni a, Aizawlah bungrua chah chawp a nih avangin phai company rate aiin a to.

2. Motor hring 25 hi Aizawlah sak len a ni a, motor pawl 25 chu New Delhi-ah sak len a ni. A hring 25 hi 3.5 cum capacity-a sak danglam hnuah Aizawl a thlen tawh si avangin, Aizawlah 8 cum capacity-a sak len a ni a, a pawl chu New Delhi-ah 8 cum capacity-a sak len a ni.

3. Motor hring 25 sak belhna man a to bik chhan chu, a body zawm belhna hmanrua hi plain sheet ni loin, kahpathir milimeter 4-a chhah chauha siam a ni a, kahpathir hi Aizawlah a awm loh avangin Kolkata-ah chah a a ni a, a siam man pawh New Delhi aiin a to.

4. Motor pawl 25 sak belhna man hi Rs. 24,47,250 a ni a, motor hring 25 sak belhna man hi Rs. 58,25,000 a ni.

407 LPK garbage vehicle pakhat contract rate chu Rs. 18,90,000 a ni tih sawiin SIPMIU chuan, "A pawl 25 body sak belh hnuah pakhat man Rs. 19,87,890 a ni a, a hring 25 hi pakhat man Rs. 21,23,000 a ni. Bawlhlawh motor phurh theih zat pawh 3.5 cum aṭangin 8 cum-ah siam chhuah a ni," an ti. Kamrup Construction leh Ariamrit Engineering ten 3.5 cum capacity an supply-na rate Rs. 20,26,879 leh Rs. 26,94,300 aiin SIPMIU, Aizawlin 8 cum capacity an leina a tlawm zawk niin an tarlang.

SIPMIU chuan, bawlhhlawh paihna motor leina sum chu ADB programme NERCCDIP hnuaia mi a nih thu sawiin, "He programme-ah hian contract package reng reng Ministry of Urban Development leh ADB ten an pawmpui hnuah chauh tihfel ṭhin a ni a, bawlhhlawh paih motor leinaah pawh chutiang zela kalpui a ni," an ti.

SIPMIU-in bawlhhlawh paih motor, LPK 407 truck 50 an leina man chu a to uchuaka an ngaih avang leh motor hring leh pâwl man a inan loh avangin June 2, 2018 khan MNF ṭhalai hruaitute'n press mite an kawmnaa, insawifiah tura UDPA minister Zodintluanga an phût thu an lo puang tawh.

MNYF ṭhalai vice president H Ram­dinliana tarlan danin, bawlhhlawh paih motor Tata 407 LPK tipper a hring (green) 25 leina man chu July 5, 2017-ah cheng nuai 400 leh August 17, 2017-ah cheng nuai 85.06 pek a ni a; tipper hring 25 leina man chu a vaiin cheng nuai 530 niin, pakhat man chu cheng nuai 19.87 a ni. Tipper pâwl (blue) leina man chu June 16, 2017-ah cheng nuai 496 pek a ni a, chawhrualin, pakhat cheng nuai 21.26 man a ni.

Motor hring leh pâwl man inthlauhna chu pakhatah cheng nuai 1.35 a ni a, a rawng vanga motor man inthlauhna chu motor 25-ah chuan cheng nuai 33.77 a ni.

MNYF hruaitute hian SIPMIU-in motor an lei laia Tata 407 LPK pakhat man chu Rs. 9,80,000 vel a ni tih an sawi. Hemi aṭanga chhût chuan, motor pâwl pakhat man Rs. 19,87,890 chu LPK 407 pangngai man aiin nuai 10.78 velin a to zawk a, motor hring pakhat man Rs. 21,23,000 chu LPK 407 pangngai man aiin nuai 11.43 velin a to zawk tihna a ni.