MNYF-in Zorama an rin tawk thu an puang

MNF ṭhalai hruaitute chuan nimin khan Mizo Hnam Rûnah an president Lalrinawma, MLA kaih­hruaiin Extended Meeting a nei a; resolution pass in, kumina MLA inthlanpui awm turah MNF an sorkar ngei an rin tlat thu leh chumi tur chuan Zoramthanga kaihhruaina an rin tâwk thu an tarlang.

MNYF resolution chuan, Congress sorkarah corruption-in bu a khuar nghet hle nia sawiin, "Aizawl khawpui chhung hmun 10-a vantlang inthiarna SIPMIU hnuaia siam chu a to uchuak hle a, Assembly Committee on Estimate pawhin, ‘Thil tê tak tê tê sak nana hleihluak taka sum sênnna a ni’ tiin a report a ni. Hetah hian eirukna lian tham tak a inphûm ngei niin kan hria a, he thil hi Pu Lal Thanhawla hian pho ro ngei se kan ti a, kan phût tlat a ni," a ti.

MNYF chuan, Lal Than­hawla kaihhruai sorkar chu Mizoram kaihruai zel tlak loa an ngaih thu te, June 5, 2018-a Siaha bus chesual leh June 4, 2018-a Lunglawna leimin vanga chhiatna rapthlak tak a thleng chu pawi an ti a, chhiatna tâwk chhungkuate an tawrhpui thu an tarlang bawk.