Siaha district-a hnathawhte thlirho

Siaha District Deve­lop­ment Coor­dination & Monitoring Commitee (DISHA) chu, nimin khan DC conference hall-ah an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhu a; sorkar laipui scheme hnuaia hmasawnna hnathawhte an thlirho.

CL Ruala chuan, Siaha-a head of office-te chu CSS sum hmanga ram rotling siam tum tur leh mipuite nun nawm zawkna tur rahbi tuksak tura ṭan la ṭheuh turin a chah a, "In harsatna tawhna report ngaihthlak ai hian in hlawhtlinna report ngaihthlak tur tam zawk ṭhin rawh se," a ti.

Ronald Sapa Tlau chuan, head of office-te chu tuk tin hna thawk tura an chhuahin, 'Engtikah nge tranfer order a chhuah dawn' tih nghâka thawk loin, vawiinah hian mipui tan thil chhenfâkawm eng nge ka ti theih ang, ti rilru nen hna thawk ṭhin turin a chah.

Meeting-a tarlan danin, Siaha district-ah hian MGNREGA hnuaiah kum 2017-18 chhung khan ni 78 inhlawhna siam a ni a; PMAY-G hnuaiah kum 2017-18 chhungin chenna in 140 sak tura ruahman a nih laiin, a sakna tur sum tun thlengin an la dawng lo.

PMGSYhnuaia kawng sial hna thawh mek zingah, Rawlbuk-Lungtian inkar kawng km. 14-a thui leh Niawhtlang-Chakhei inkar km. 29.79-a thui thawktu contractor-te an thawh ṭhat loh avangin bàn (terminate) tura buaipui mek a ni.

Meeting-ah hian Siaha bialtu MLA Dr K Beichhua leh MADC chief executive member N Zakhai te pawh an tel a ni.