Rangvamuala mirethei in sak hawng

UDPA department-in Basic Services to Urban Poor (BSUP) project hnuaia mirethei tana in an sak, Economically Weaker Section (EWS) Housing Complex, Rangvamuala mi chu June 6, Nilaini khan UDPA minister Zodintluanga'n a hawng.

Zodintluanga chuan, Aizawl khawpui huam chhungah Jawaharlal Nehru National Urban Renewal Mission (JNNURN) sub-component BSUP project EWS Housing Complex chu hmun paliah sak zawh a nih tawh thu a sawi a, "Lawipua EWS Complex-ah chhungkaw tam tak an awm tawh a, hman níah Durtlangah grounding day kan hmang bawk," a ti.

UDPA Minister chuan, EWS Housing Complex-a awm tur chungkuate chu an dam chhungin an luah theih tur thu leh an fate pawh an awm zui theih tur thu a sawi a, "Amaherawhchu, mi dang hnena luah chhàwntirte chu hnawhchhuah an ni ang a, an luahtirte pawh hnawhchhuah an ni ang," a ti.

Zodintluanga chuan, khawsak harsa zual, in nei si, a thawm ṭhatna nei si lo puih ngaite ṭanpui nan CM Housing Scheme kaltlangin chhungkaw pakhat Rs. 50,000 pek a la nih dawn thu a sawi bawk.

Minister hian sorkar aiawhin EWS Housing Complex chu a luahtu turte neitu nihna a hlan a, inkhawm zawhah a luahtu turte chu pawhfuh hmangin an chenna tur thlantir an ni.

Bialtu MLA K Sangṭhuama pawhin thu sawiin, EWS Housing Complex luahtu turte chu Rangvamual khua leh tui ni thar tur an nih angin, khawtlang hruaitute thu awih tur leh sorkarin tih tur a tukte zâwm turin a chah a, "In in thar aṭangin in ṭha zawk, mahni puala in la sak leh theihna turin rilru nei takin hma la chhunzawm ang che u," a ti.

In luah turte hnena in hlan tâk hi block 10 a ni a, building block pakhatah chhawng li zel awmin, chhungkaw 16 an awm thei. In pakhat hi sq.metre 27.67-a zau a ni a, overhead water tank, tui litre 500 dawng pek vek niin, electric connection leh tui connection chu a luahtu turte'n an chawi a ngai dawn a ni.