Sorkar hmalakna dâl tumtute chu kan pal thlu pawp pawp dawn - CM

Chief minister Lal Thanhawla chuan, hmasawnna tura sorkar hma­lakna dâl tum an awm chuan an pal thluk pawp pawp tur thu nimin khan Congress Bhavan-ah a sawi.

Lal Thanhawla chuan, an hma­lakna dâltu pal thlûk pawp pawp loh chuan an duh ang leh mipui duh angin an kal chak theih loh a hlauhawm thu a sawi a, "Chak taka kan kal theihna atan keimahniah thawhhona ṭha a awm a, kan hotute'n eng pawh lo ti se, 'Kan tih ve ni âwm takin, a va ṭha em' kan ti mai zel tur a ni," a ti.

Mizoram sorkarin medical college a peih titih tawh tih sawiin Chief Minister chuan, "Keimahni chhungah puitling lo se ti an awm em ni, tih ngaihtuah tura thil ti an awm. Chu'ng ang zawng zawng chu kan hotute puihnain ka kháwng thlawn vek dawn," a ti a; sorkar chu chak taka a kal puat puat tur thu a sawi.

CM Lal Thanhawla chuan, DC atan Mizo an awm mang tawh lo tih sawiin, "Mizorama DC leh SP tam tak hi hnam dang an ni. Mizo ṭhalaite zingah central service-a inziak tling thei kan awm tawh lo a, inziah tlin tum pawh an awm lo," a ti a, Mizo ṭhalaite chu he mi kawnga ṭan lak a ṭul thu a sawi.

Congress party president Lal Thanhawla chuan, The Citizenship (Amendment) Bill, 2016 chu a thil tum an hriat chian avangin, a tìr aṭangin an party-in an duh loh nghal thu a sawi.

Lal Thanhawla chuan, Citi­zenship (Amendment) Bill chu a tìr aṭangin a thil tum an hriat chian thu sawiin, "Sorkar laipuiin a tum tak chu India ram páwna awm Hindu lo let lehte khua leh tuia pawm a ni ber. Sakhaw dang an ngaihtuah lo. Tu'ma phût chhuah ngai loin a tìr aṭangin kan do sa a ni," a ti.

BJP-te chu term khat an sorkar hmain an tlahniam nghal nia sawiin MPCC President chuan, "An thawhpui leh innghahnate'n an bànsan mek a, Congress kan tho kâng leh mek. Party dang hoin BJP an ning a, thawhho an tum," a ti a; BJP-te chuan ram pum tana ṭha tura an thutiam tihhlawhtlin an la nei lo niin sawi.

Lal Thanhawla chuan, sorkar laipuiin pawisa a tihthih chu India economy-in a tuar hle nia sawiin, "India ram páwn aṭangin black money lâk lêt an intiam a, pakhat mah an la la let lo," a ti.

NLUP chungchangah Lal Than­hawla chuan, "Ṭha an tih loh vang ni loin, ṭha an tih em avangin eptu party-te'n an hêk a ni. Sorkar laipui thu a ni lo, kan programme a ni," a ti a; NLUP chu nakinah chuan sorkar laipuiin an la entawn dawn niin a sawi bawk.