Citizenship (Amendment) Bill sawihonaa Tel loh vangin Zorama'n ngaihdam a dil

MNF president Zo­ram­thanga chuan, Citizen­ship (Amendment) Bill, 2016 chu an party-in an duh loh thu a sawi a; June 7, Ningania Pla­nning Minister hoa Citi­zenship (Amendment) Bill sawihona meeting-ah rokhawlhna avanga an tel theih loh thu sawiin, mipui hnenah ngaihdam a dil.

Nimina Mizo Hnam Rûna inkhawmah Zoram­thanga chuan, nimina chanchinbu chhuakah Citizenship (Amendment) Bill sawihonaah MNF aiawh an tel loh thu tarlan chungchang a sawifiah a, "Eng emaw rokhawlhna avangin kan tel ve thei ta lo hlauh mai a, a buat­saihtute leh mipui hnenah ngaihdam kan dil a ni, pawi kan ti hle. He Bill hi MNF chuan kan do tlat thu kan puang tawh a, kan do zel tur thu leh kan duh lo hulhual tih ka puang nawn leh a ni," a ti.

Mi ṭhenkhatin MNF hotute'n dinna bial tur leh candidate tur mumal an la hre lo nia an sawi ṭhin chungchang chhangin Zo­rama chuan, "Keini chuan Nomination Commi­ttee siamin vawi tam kan ṭhukhawm tawh a, Cong­ress-ho hian nomina­tion pawh an la siam awm kan hre lo," a ti a; hun takah uluk taka kan ngaihtuah chu an la puan mai dawn thu a sawi.

Zoramthanga chuan, politics-a a pawimawh lai ber chu mahni hmasial lohna leh dawhtheihna a ni tih sawiin, "He thu hi kan vawn tlat chuan thil dang chu politics-in a ken tel sa vek a ni. Keini MNF chu Pathian leh mipuite zarah kan sorkar ngei kan beisei a, hmasawnna hna thawk tak tak tur pawhin kan inbuat­saih fel hle tawh a ni," a ti.

MNF President hian an party zawm thar Dr ZR Thiamsanga chu nimin khan an party-ah a lawm lut nghal. Dr ZR Thiam­sanga hi Mizoram sorkara thawk ṭhin a ni a, May 2018 khan voluntary pen­sion-in a hna a bànsan a ni.