Pathian thu hmangin ram kan kaihhruai dawn - Lalduhoma

Ṭangrual pawl, Zoram Peoples' Move­ment (ZPM) chief minis­terial candidate Lalduh­oma chuan, Mizoramin party sorkar ni lo, mipui sorkar a mamawh tawh tak zet tih a sawi a, "Pathian leh mipui zara kan sor­kar chuan Pathian thu hmangin he ram hi kan kaihhruai dawn a ni," a ti.

Nimina Lunglei Con­vention Centre-a mi thar lawm luhna inkhawmah thu sawiin Lalduhoma chuan, "Ram a retheih a, a tlûkchhiat reng rengin thil thleng ṭhin eng emaw zat a awm a, pakhatna chu eirukna a ni a, pahnihna chu mirethei nêk sâwrna niin, pathumna chu hmasawnna rualkhai lo a ni," a ti a; tuna Mizoram awm dan chu - eirukna, mirethei nêk sâwrna leh sawipuitu nei ve lote hmasawnnain a thlawh khûm hluarna a nih thu a sawi.

Lalduhoma chuan, Mizoram a rethei a, a tluchhe mek a, Kristian sakhua pawh a him ta lo nia sawiin, "Kan ramah kan sakhuana leh ram rorelna inkarah âwl zau tak a awm avangin kan sakhua leh ram rorelna a kal hrang tulh tulh a, kan ram leh hnam a dam leh theihna tur chuan kan sakhua leh ram rorelna kan kal kawptir a ngai. Kan politics-ah hian Pathian ram a thlen a hun tawh a ni," a ti.

MPC president Lal­hmangaiha Sailo chuan, Mizoramin sem policy a chhiatpui hle tih sawiin, "He ti zat sum sênna policy ni si, kan ramin a ṭhatpuina leh hlâwkpuina sawi tur a awm miah si lo hi a lungchhiatthlak hle. Mizoramin a thlir ber chu sorkar ṭha a ni a, mipuite pawh kan tuihâl tawh hle," a ti a; sorkar ṭha din turin ZPM chuan ke a pên mek thu a sawi.

Lalhmangaiha Sailo chuan, kum 30 chuang Mizoram kaihhruai tawhtu Congress leh MNF party hnuaiah Mizoram chu dinhmunah derthâwng leh hlauhthawnawm a ding mek niin a sawi a, "Heng party pahnihte chungah hian rinna kan la nghat zel dawn em ni? Kan ram hi a dam theih nan kalphung thar, mipui sorkar ṭha hma ngaitu mipuite'n kan thlan chhuah a ngai tawh tak zet a ni," a ti.

Rev.Dr K Thanzauva pawhin thu sawiin, Mi­zoramah hnam lung­phûm leh sakhaw lungphûm a nghîng ṭan nia sawiin, "Zu kan zuar a, zu in mi kan tam zel avangin mipat hmeichhiatna a hluar zel a, chu chuan natna hlauhawm tak HIV/AIDS a tipung zel a, a manganthlak tak zet a ni," a ti a; ZPM innghahna lungphûm chu Isua Krista a nih thu a sawi.

Inkhawm hi ZPM Southern headquarters chairman Lalrinzuala, ex-minister-in a kaihruai a; MPC president Lal­hmangaiha Sailo-in mi thar lawm luhna hun a hmang.

ZPM zawm thar an lawm luhte chu MNF aṭangin mi 594, Congress aṭangin mi 501 leh neutral mi 183 an nih thu ZPM thuchhuah chuan a tarlang.