Ṭha nia hriatte ti mai turin HM-in MCS-te a chah

Mizoram Civil Service Association (MCSA) chuan nimin khan Aijal Club-ah General Conference vawi 43-an hmang a, Home minister R Lalzirliana'n a hmanpui. Minister chuan, chung lam aṭanga nawrna a awm a nih pawhin, ṭha nia an hriat chu ti mai turin MCS officer-te a chah.

MCSA Conference hi vice president K Lalding­liana'n a kaihruai a, MCS tharte lawm luhna hun a nih bakah, kum 2017-18 chhunga MCS officer hlui thite sûnna leh hriatrengna hun hman a ni.

Minister R Lalzirliana chuan, mahni hnaah rinawm a pawimawh thu sawiin, "Chung lam aṭanga nawrna a awm a nih pawhin ṭha nia kan hriat chu kan ti mai tur a ni. Kan hnaah kan rinawm tlat chuan kan zahawm mai a, thlen chin aṭanga hmasawn zel a pawimawh," a ti a; sorkar hna thawh chhungin mi chhiatna sawi reng ai chuan, mi ṭhatna hmuhsak a, anmahni tiphûr tura awm a pawimawh thu leh chu chuan hmasawnna leh inlungrualna a thlen ṭhin thu a sawi.

R Lalzirliana chuan, MCS officer-te chu ram leh hnam tana a tak taka thawktute an nih thu sawiin, an thawh ṭhat leh ṭhat lohah ram hmasawnna thui tak a innghah thu a sawi a, "MCS officer-te chu mi dang tana entawn tlaka awm tur leh kan hnathawhna kawngah hmasawn zel kan tum tur a ni," a ti.

Conference-ah hian chawhnuah MCSA pre­sident Lalzirmawia Chhangte kaihhruaiin rorel a ni a; an rorel zingah MCS Rules, 2000 siamṭhat te, MCSA Welfare Fund Rules siam ṭhat te, district administration chak zawk leh awm ze nei zawka a kal theih nan tun hmaa DC office-a department hrang hrang awm ṭhinte chu DC office hnuaia rîn luhte a tel.

MCSA Conference-a an tarlan danin, tun din­hmunah Mizoram sorkar hnuaiah MCS post 441 a awm a, MCS 199 an awm mek. MCS service mek 199 zinga 106 chu Aizawl district-a awm an ni a, paruk chu Mizoram páwna Mizoram House-ah an awm a ni.