KHAWTHLIR

Thisen pe
Saitual Joint YMA chuan nimin khan an khuaah blood donation camp an huaihawt a, Aizawl Civil Hospital tan thisen unit 66 an pe a, a petute mipa 46 leh hmeichhia 20 an ni.

Bike chesualah thi
June 7, Ningani tlai dar 4 vel khan Thenzawl khaw chhunga chhim lam kawtchhuah kawngpuiah Bike MZ-01 D-8144 chesualin, a bul leilet sirah a tla a; bike khalhtu NB Nahar Kalam Lasker (23) s/o Annuar Ali Lasker, Daksin, Cachar district chu a hmunah a thi. Bike hnunga chuang leh a neitu a hliam bawk. Mitthi hi Don Bosco School khelmual lai mek­tu JCB operator a ni.

Jail enfiah
Mizoram State Legal Services Authority (SLSA) member secretary Vanlalenmawia chuan Ningani khan Lawngtlai District Jail a tlawh a, jail dinhmun a enfiah bakah, jail tangte nen an inkawm. Lawng­tlai District Jail-ah hian tang 23 an awm mek a, an zinga 16 chu an thubuai ngaihtuah lai mek a ni.

Chaw nghei zel
Mizoram Underground Returnee Association (MURA) chuan, Mizorama sorkarna chelh mektu Congress party nena inthlan hmaa an inremnate tihpuitlin phûta an pisaa chaw an nghei chu an la chhunzawm zel. Chawnghei hi June 6, Nilaini tlaiah an ṭan a ni.

Tlân phal lo
Traffic SP H Ram­thlengliana chuan thupek chhuahin, Vaivakawn aṭanga Dawrpui Bazar Bungkawn panna kawng chu June 8, 2018 aṭangin zan dar 8 aṭanga zing dar 5 thleng siam ṭhin a nih dawn tih a tarlang a, "Hna thawh zawh hma chu hna thawh hun ­chhungin lirthei kal phal a ni dawn lo," a ti.

BJP-in lawm lut
Mizoram BJP chuan nimin khan an pisaah party inkhawm an buatsaih a, an president Prof. JV Hluna'n Sinlung Hills Development Council chairman hlui Hming-chungnunga leh mi dang eng emaw zat a lawm lut niin an tarlang.