Hnam himna tel lo hmasawnna chu hnam boralna mai a ni - ZPM GS

Ṭangrual pawl, Zoram Peoples Movement (ZPM) general secretary K Sapdanga chuan, nimin khan an pisaa inkhawmah thu sawiin, hnam himna tel lo hmasawnna chu hnam boralna mai a nih thu a sawi.

K Sapdanga chuan, January 30, 1948-ah Birla House compound-a Nathuram Godse-in Mahatma Gandhi a kah hlum chhan chu Pu Gandhi-a ngaihdan, India ram chu sakhua leh hnam hrang hrang pangpar huan anga inngeih tlang taka chenhona tur ram a ni, a tih vang a nih thu a sawi a, "Chu chu duh kum 1925-a din RSS-te’n an duh lo a, chutiang chu tharum hmanga India ram lak an tum dan a ni,” a ti.

BJP chu Parliament-ah MP 274 neiin, MP ngah ber ni mah se, India danpui siamṭha turin hmun thuma ṭhena hmun hnih a ngaih avangin an la tlin lo tih sawiin K Sapdanga chuan, "Mizoram MP pakhat chauh nei pawh Chawngte thleng thlengin an hotu lawk ber berte an lo kal peih a ni. BJP-te hian hmasawnna tam tak min tiam ang, mahse, lotus huan par lo hi chu India ramah a ṭiak tur a ni lo tih hi an tum ber a ni," tiin, hnam himna tel lo hmasawnna chu hnam boralna a nih thu a sawi.

ZPM General Secretary chuan, kumina Mizoram Assembly inthlanpui awm turah thatchhiat inzirtirna leh taimak inzirtir duh pawl an inbûk dawn tih sawiin, "Chief Minister tur mi langsar pathum kan bûk dawn a, heng zingah hian ordained upa an awm em tihte kan bûk dawn. I ram, i hnam, i sakhua humhim phawt la, hmasawnna chu i thawk dawn nia tih hi ZPM tih tur chu a ni," a ti.

ZPM chuan, nimina an chhung inkhawmah hian Hrangturzo bial aṭangin ZPM zawm thar voter eng emaw zat chu ZPM Steering Committee chairman Lalliansawta’n a lawm lut niin an tarlang a, chu'ng zingah chuan V/C member ni lai pahnih an tel tih an sawi.