Chhiatrupnaa chêt lâk dan zir zo
Chhiatrupna thlen thulha chêt lak dan tur inzirtirna, Aapda Mitra Training of Community Volunteers chu CTI, Sesawngah zawh a ni. June 7, Ningani khan a khârna inkhawm buatsaih a ni a, Disaster Management and Rehabilitation (DMR) minister C Ngunlianchunga'n a hmanpui.
C Ngunlianchunga chuan, Mizo tlangval tlawmngai thlan chhuahte'n disaster management an training chhuak chu lawmawm a tih thu sawiin, "Khawtlang mipui tan an thlamuanpuiawm hle dawn. Mizoramah leimin vangin chhiatna nasa tak a thleng ṭhin a, tun hnai lawkah pawh fûr a intan chauh laiin leimin vangin thihna rapthlak tak a thleng leh der tawh a ni," a ti.
DMR Minister chuan, chhiatrupna hmachhawn dan tur leh mi mangang, ṭanpui ngaite leh chhanchhuah ngaite puih dan tur chu uluk taka zir a pawimawh tih sawiin, "Mizo hnam nunphungin tlawmngaihna, ṭanpui ngaite ṭanpui hi a keng tel tlat a, chutihrual chuan, chhiatna pawhin hmanlai a ang tawh lo," a ti a; concrete-in lian pui chim karah chhanchhuahna hna thawh a ṭul ṭhin avangin training chhuakte an pawimawh thu a sawi.
Aapda Mitra Training of Community Volunteers-ah hian Maubawk, Chite Veng, Sihphir, Sairang, Sairang Dinthar, Sihhmui, Tuirial, Saitual leh Sakawrdai aṭangin YMA volunteer mi 59 an tel.
Aapda Mitra Scheme hnuaiah hian India rama tui lian tuar thei zual nia ngaih state 25 aṭangin district 30 sorkar laipuiin a thlang a; chu'ng district tinah chuan kum hnih chhungin mi 200 training tir tur a ni a, an mamawh ṭul ang hmanruate pawh pek tur a ni.