KHAWTHLIR

GIG Motors chuan Covid-19 dona atana a ṭul anga hman turin Rs 5,00,000 an pe chhuak a, YMA branch hrang hrang­ah an hlan a, nimin khan Aizawla branch 12 hnenah Rs 20,000 ṭheuhin ṭan-puina an sem. Mizoram College Tea­chers Association (MCTA) chuan sorkarin a ṭul apianga a hman turin March 23 khan Health minister Dr R Lalthangliana hnenah Rs. 1,50,000 an hlân. MJA, Lawngtlai district pawhin Central YLA hnenah Rs. 3,000 an hlân bawk. Lalroenga, chairman MPCC Drivers' Welfare Dept chuan Republic Veng Local Task Force hnenah Rs 1,00,000 a hlan a, Dr Lalmalsawma Nghaka (D-3 Business Enterprise) chuan Covid-19 donaa a hmatawnga awm police-te hman atan Rs 50,000 a hlan bawk. Pawl leh mimal ṭhahnemngaite'n local task force hnenah thilpek ṭhahnem tak an hlan tawh a ni.

School Education department secretary Esther Lalruatkimi chuan nimin khan hriattirna tichhuak­in, kum 2020-21 atana sikul kai ṭan hun, April thla tir lama ṭan tur chu Coronavirus hri léng vangin sawn a nih thu a tarlang a, ṭan hun tur hriat theih a la ni lo.

March 23, 2020-a Synod Officers’ Meeting inráwn khawmin thutlukna a siam angin, Mizoram Synod chuan Coronavirus (Covid-19) chungchanga hma la tura Mizoram sorkarin a din State Level Task Force kaltlanga a ṭul apianga an hman atan Chief Mi­nister's Relief Fund-ah nimin khan Rs. 2,00,000 an hlân.

Indian Oil Corporation (IOC) chief gene­ral manager G Ramesh chuan, hmarchhak state hrang hrangah Covid-19 leng vangin lockdown ni mah se, eirawngbawlna gas-ah harsatna a awm loh tur thu a tarlang a, mipuiin harsatna an tawh lohnan ṭan an la tih a puang. IOC CGM chuan mipuite chu gas chung­changah chiai lo turin a chah a ni.

Legislative Assembly speaker Lalrinliana Sailo chuan, Covid-19 hri léng mek vanga fimkhur thilah Public Account Committee-te'n Champhai leh Chhiah­tlanga zir chianna nei tura programme an duan tawh chu ṭhulh a nih thu a puang.