Covid-19 avangin calamity-ah Vawk hri ASF puan a ni dawn lo

Mizoram sorkar chuan Covid-19 hripui léng avangin vawk hri, African Swine Fever (ASF) léng mek chu nunphung tikhaihlaka chhiatna thleng (calamity)-ah a puang thei dawn lo.

Animal Hunsbandry & Veterinary (AH&Vety) department chuan, Mizorama vawk hri léng mek avanga vawk thi neitute'n State Disaster Response Fund (SDRF) aṭanga chhawm­dawlna an hmuh theih nan ASF chu calamity-a puang turin Disaster Management & Rehabilitation (DMR) department-ah dilna an thehlut a ni.

DMR secretary Vanlalngaihsaka chuan Vanglaini palai zawhna chhangin, ASF avanga vawk thi neitute chhawmdawlna pek duh mah se, SDRF sumin a daih dawn loh thu a sawi a, "SDRF-a kan sum neih mek zinga 50% chu sorkar laipuiin Covid-19 zangnadawmna leh a kaihhnawihah hman min phalsak a, a la bâng 50% dang chu chhiatna thleng hrang hrang atan hman tura dah a ngai," a ti.

ASF chu calamity-a an puan chuan vawk thi neitute hnenah chhawmdawlna tur pawisa eng emaw zat pek a ngaih dawn thu sawiin Vanlalngaihsaka chuan, "Tuna Mizorama vawk thite rate hrang hrang aṭanga kan chhût khan SDRF-a sum hman theih la awm 50% hian a daih dawn loh bakah, kângmei, leimin leh chhiatna hrang hrang a awm palha hman tur dah a ngai a ni," a ti a; sumin a daih dawn loh avangin ASF chu calamity-ah sorkarin a puan theih loh thu a sawi a ni.

ASF avang hian nimin thleng khan Mizo­ramah vawk 29,686 a thi tawh a, khua/ veng 271-ah ASF a léng tih finfiah a ni tawh. Nimin bikah ASF vangin vawk pathum a thi.

Animal Husbandry & Veterinary depart­ment tarlan danin nimin thleng khan ASF lênna nia rinhlelh, ASF infected area-a puan ni lo khua/ veng 96-ah chhan hriat loa vawk thi 523 a awm tawh.