Offline hmangin board exam Buatsaih theih ngei kan tum - Education Minister

School Education minister Lalchhandama Ralte chuan, board exam - High School Leaving Certificate (HSLC) leh Higher Secondary School Leaving Certificate (HSSLC) examination-te chu offline hmang ngeia buatsaih an tum thu a sawi.

Vanglaini palai zawhna chhangin Education Minister chuan, HSLC leh HSSLC-te chu offline hmang ngeia exam tir an tum thu a sawi a, "Academic session liam taah pawh khan Covid-19 léng karah offline hmangin kan exam tir thei a ni. Pawl dangte a harsa deuh a nih pawhin, board exam bik tal hi chu offline hmang ngeia exam tir hram kan duh a, chumi tur chuan ruahmanna pawh kan siam. Exam tir theih ngei kan inbeisei," a ti.

Lalchhandama Ralte chuan, board ni lote sikul kal hun turah chuan State Disaster Management Authority (SDMA) State Executive Committee (SEC) thu an ngaihchàn thu sawiin, "Mihring nun­na khawih thilte a ni a, chuvangin, department lamin lo nawr emaw, rawtna neih ṭha kan ti lo," a ti a; hripui léngin ziaawm lamte a pan a nih erawh chuan ngenna an thlen ve tur thu a sawi.

Hetih lai hian, SDMA hnuaia SEC thuchhuak angin, November 1, 2021 aṭang khan board exam - HSLC leh HSSLC hma­chhawn tur pawl 10 leh pawl 12 zirlaite chuan sikul an kai ṭan a ni.

Aizawl Municipal Council-in a huam loh khaw dangah chuan Covid-19 léngin ziaawm lam a pan chuan hun eng emaw chen sikul hawn phal tawh a ni a, sikul hawng tur erawh chuan an khua village task force-te'n rem an tih a, an DC-in phalna a pek a ngai thung. Hei vang hian khaw eng emaw zatah chuan sikul an kal tawh.

AMC huam chhungah chuan sikul kal phal a nih loh char char hnuah, SDMA SEC chuan inkaihhruaina an tihchhuah thar berah November 1 aṭangin HSLC leh HSSLC exam turte tana sikul kal a phal tawh a ni.