MPF-in inthlan thlirlet; lawmthu an sawi

Mizoram People Forum (MPF) Governing Board chu nimin khan Synod Office committee room-ah an ṭhukhawm a, Tuirial by-election thlirletin, inthlanna tluang taka buatsaih a ni chu lawmawm an tih thu an tarlang.

MPF thuchhuah chuan, "Inthlanna felfai leh thianghlim a awm theihna tura ṭhahnemngai taka thawktu bial chhung khaw tina MPF local forum, constituency forum leh Kolasib district forum-te chungah MPF chuan lawmthu a sawi," a ti.

MPF chuan, Kolasib District Election Officer leh a thawhpuite nen an thawhho thu te, political party-te ṭawiawmna leh hriatthiamna thui tak an dawn thu te, chanchinbu miten MPF thuchahte an puan darhsak ṭhin thute sawiin, an lawm thu an tarlang a; mipui leh political party-te'n ram hruaitu an thlannaah felfai leh thianghlim taka an kalpui zel theih nan te, therhlo leh hmanraw thianghlim lo hmanga vote zawng lo tur te, ram hruaitu ṭha thlan kawnga ṭan la zel turin mi tin an chah nghal bawk.