Media kaihhnawihah sorkar hnathawkte vaukhàn

Mizoram sorkar chuan, social media leh media huanga sorkar hna­thawkte'n an ngaihdan an sawi chhuah theih chin tura inkaihhruaina, Central Civil Service (Conduct) Rules, 1964 Rule 9 chungchangah sorkar hnathawkte hriat tur a tichhuak thar.

CCS (Conduct) Rules, 1964 Rule 9 chungchanga thuchhuah thar siam hi sorkar hnathawkte'n an mahni ngaihdante an sawi chhuahnaah thil pawi a thlen lohna tur a nih thu tarlan a ni.

Sorkar thuchhuah chuan, October 4, 2021-a Mizoram sorkara secre­tary-te ṭhukhawmin thu­tlukna an siam tawh angin CCS (Conduct) Rules, 1964 Rule 9 tihchhuah leh a nih thu a tarlang a, "Sorkar sawisel chungchanga Rule 9 of CCS (Conduct) Rules, 1964 tarlan angin, sorkar hnathawk tu mahin radio leh electronic media (TV, etc) kaltlangin emaw, lehkha reng reng ama hmingin emaw, tu hming nge tih hriat loh/awm loin emaw, hming lem invuahin emaw, mi dang hmingin emaw a chhuahin emaw, press-ah thawnin emaw, vantlang hmaa puang chhuakin emaw, a ngaihdan emaw, thu dik tak sawina pawh ni se, a hnuaia tarlante hi chu a sawi ve tur a ni lo," a ti.

Sorkar hnathawk, Rule 1(3) hnuaia proviso hnihna huam tel tawhte chungchangah chuan an hnathawh dinhmun humhalh nan leh hma­sawn zel nana sorkar hnathawkte'n trade union emaw, association emaw office bearer an nihna anga an ngaihdan/ thlir dan an sawi chungchang chu khapna dan hian a huam lo tih tarlan a ni a; sorkar hnathawkin a hnena mawhphurhna pek a thawhna leh sorkar hnathawk a nihna anga a sawi ngai a sawite a huam lo tih tarlan a ni bawk.

Sorkar hnathawkin a sawi loh turte
1. Sorkar laipui emaw, state sorkar emawin policy a neih kal lai emaw, tun hnaivaia a neih emaw, a thil tih (action) a ṭha lo zawnga nghawng nei thei tura sawichhiat leh sawisel.
2. Sorkar laipui leh eng state sorkar pawh ni se, an inkara inlaichìnna ṭha tibuai/tichhe thei zawnga sawisel.
3. Sorkar laipui leh ram dang inkara inlaichìnna ṭha tibuai/tichhe thei zawnga sawisel.