RAT hmanga endik zat a pung zel RT-PCR hmanga endik a tlahniam

Covid-19 vei leh vei loh hre tura Mizorama swab sample endikah RT-PCR hmanga endik zat percentage a tlakhniam zel laiin, Rapid Antigen Test (RAT) hmanga endik zat percentage a pung zel.

Sorkar laipuiin swab sample endik zawng zawng zinga 70% tal RT-PCR hmanga endik tura state leh union territory sorkarte a hriattir laiin, Mizoramah chuan RT-PCR hmanga sample endik zatin sorkar laipui duh dan a pha lo hle a, a phâk lo nasa tial tial bawk tih a lang.

September 30, 2021 thlenga dinhmunah chuan, swab test-na atana rintlak ber RT-PCR hmanga Mizorama swab sample endik zat percentage chu 25.48% niin, sorkar laipui duh dan a pha lo hle a; sorkar laipui duh dan a phak lohna hi zual zelin, November 2, 2021-ah chuan 2.71% chiah a ni tawh.

Hetih lai hian, swab sample endikna atana rintlak tâwk loa ngaih RAT hmanga endik zat chu a pung zel a; September 30, 2021 khan RAT hmanga Mizorama sample endik zat percentage chu 68.49% a nih laiin, November 2 thlenga dinhmunah chuan 70.38% a tling tawh a ni.
RT-PCR ang thoa rintlak nia sawi TrueNAT-PCR hmanga endik zat percentage pawh a tlahniam hret hret a, September 30, 2021-ah 5.68% a nih laiin, November 2, 2021-ah chuan 5.41% a ni. Fluorescent Immunoassay (FIA) hmanga endik zat percentage a pung hret bawk a, September 30, 2021-ah 0.35% a nih laiin, November 2-ah chuan 0.48% a tling tawh a ni.