Myanmar ráltlânte dan hrilhfiah

Hnahthial Police (District Executive Force) bultumin nimin khan sorkar official ṭhenkhatte'n Hnahthial district-a Myanmar ráltlân awmna khuate an tlawh a, hmeichhia leh naupang kaihhnawih dante an hrilhfiah.

Legal awareness campaign hi Hnahthial additional SP Bijoy Gurung hoin Thingsai, Bualpui-H, Tarpho leh Khawhri-ahte neih a ni a; SDPO Vanlalbiaka Joute hoin Ngharchhip, New Ngharchhip leh Cherhlunahte neih a ni thung.

Myanmar ráltlân zingah hmeichhia leh naupang ṭhahnem tak an awm avangin The Protection of Children from Sexual Offences (POCSO) Act leh hmeichhiate dikna chanvo humhalhna chungchang dante an hrilhfiah a ni.

Hnahthial DC Office chhinchhiah danin, nimin khan Hnahthial district-ah Myanmar aṭangin ráltlân mi pali an luh belh a; chutih laiin, râltlân awm tawh sa mi 43 chu Myanmar lamah an lêt thung. Hnahthial district-ah hian Myanmar ráltlân mi 2,310 an awm mek a, an zingah chhungkaw 418 an tel a ni.